काठमाडौं । अमेरिकाको राजधानी वासिङटन डीसी मुख्यालयमा भएको एक संस्थाले भारतमा सन २०२४ मा भएको घृणा अभिव्यक्तिको रिपोर्ट तयार गरेको छ ।
रिपोर्ट अनुसार सत्ताधारी दल बीजेपीका उत्तर प्रदेशका मुख्यमन्त्री योगी आदित्यनाथ, प्रधानमन्त्री नरेन्द्र मोदी, गृहमन्त्री अमित शाह र आसामाका मुख्यमन्त्री हिमन्त विश्वास शर्मा लगायतका बीजेपी नेताहरू शीर्ष स्थानमा आएका छन् ।
सेन्टर फर दि स्टडी अफ अर्गनाइज्ड हेट (सीएसओएच) अन्तर्गतको इन्डिया हेट ल्याबले गरेको अध्ययन अनुसार योगीले ८६, मोदीले ६७, शाहले ५८ र शर्माले ३६ घृणा अभिव्यक्ति दिएको रिपोर्टमा उल्लेख गरिएको छ । उनीहरू क्रमशः शीर्ष चार घृणा अभिव्यक्ति दिने अनुहारमा परेका छन् ।
सन २०२४ मा दस्तावेजिकरण गरिएका ११६५ घृणा अभिव्यक्तिमा यी चार राजनीतिक अनुहारहरू शीर्ष स्थानमा आएका छन् । ११६५ घृणाका अभिव्यक्तिमा मुस्लिमप्रति १०५० पटक, इसाई प्रति १८ पटक र इसाई तथा मुस्लिम दुवै लक्षित ९७ पटक घृणाका अभिव्यक्ति दिइएको बताइएको छ ।
मुस्लिमलाई लक्षित गरेर ११ खालका जिहादहरु प्रयोग भएको रिपोर्टमा बताइएको छ । जस अनुसार प्रेम जिहाद, भूमि जिहाद, भोट जिहाद, जनसंख्या जिहाद, रेल जिहाद, आर्थिक जिहाद, हलाल जिहाद, धाम जिहाद, थुक जिहाद, यूपीएससी जिहाद र मल जिहाज अटाएका छन् । यी सबै नामहरु हिन्दूलाई मुस्लिमले तनाव दिन बनाइएका मोर्चाहरू भन्दै घृणा अभिव्यक्ति दिइएको रिपोर्टमा उल्लेख छ ।
सामाजिक सञ्जालको प्रयोगले घृणा अभिव्यक्ति झनै बढेको बताइएको छ । खासगरी हिन्दूत्वको मुद्दा बोक्ने बीजेपी, विश्व हिन्दू परिषद् बजरङ्ग दल, अन्तर्राष्ट्रिय हिन्दू परिषद्, सकल हिन्दू समाज, हिन्दू जनजागृति समिति, हिन्दू जागरण मञ्च, गौ रक्षा दल लगायतका संस्थाहरू जोडिएको छ । तर, रोचक कुरा रिपोर्टमा हिन्दूबारेमा विभिन्न दल तथा संस्थाहरूका नेताहरूले गरेको घृणा अभिव्यक्तिका उदाहरणहरू भने दिइएका छैनन् ।
Leave a Reply