मिस्टर डीको आवाजमा ‘आउटलः दफा २१९’को गीत ‘अन्धो कानून’ सार्वजनिक

काठ्माडौं । यही फागुन २९ गते रिलिज हुन लागेको चलचित्र ‘आउटलः दफा २१९’को नयाँ गीत सार्वजनिक गरिएको छ । सार्वजनिक ‘अन्धो कानून’ बोलको गीतमा नेता र सरकारमाथि आक्रोश पोखिएको छ ।

कानून अन्धो हुँदा देशमा नारीको अस्मिता कसरी लुटिन्छ भन्ने भाव गीतमा देखाइएको छ । गीतमा एउटै व्यक्ति बारम्बार सरकारमा गएको, जनतामाथि अन्याय गरेको, बलात्कारीलाई संरक्षण गरेकोलगायतका शब्द बुनिएको छ ।

मिस्टर डीले तयार पारेको यस गीतमा उनकै संगीत छ । गीतमा नितु पुनले पनि स्वर दिएकी छन् । गीतको भिडियोमा दीर्घ धामीको कन्सेप्ट, सम्पादन र निर्देशन छ । सलिना कार्यकारी निर्देशन रहेको भिडियोमा सलिना सुनार र साजेश बलामी पनि निर्देशन टीममा छन् । यसमा राजेश कुटुको कोरियोग्राफी छ ।

नवीन गुरुङले खिचेको चलचित्रलाई विक्की महर्जनले लेखन तथा निर्देशन गरेका हुन् । अमित अग्रहरी र निशा गुइडेको लगानी रहेको चलचित्रमा विक्की महर्जन र दीर्घ धामीको पटकथा, साहिल खानको सम्पादन र विनोद कठायत कार्यकारी निर्माताको रुपमा छन् ।

चलचित्रमा सुशील श्रेष्ठ, नरेश पौडेल, शिक्षा संग्रौला, सुमन भण्डारी, हेममान गुरुङ, सोनी लागुन, विशाल पहारी, महेश त्रिपाठी, आयन परियारको अभिनय छ ।