संसदका अध्यक्षमाथि यौन शोषणको आरोप लगाएको भन्दै नाइजेरियाकी महिला सांसद निलम्बनमा

काठमाडौं । संसदका अध्यक्ष गड्सविल अक्पाबियोमाथि यौन शोषणको आरोप लगाएको भन्दै नाइजेरियाकी महिला सांसद नताशा अक्पोटी युडुआगन निलम्बनमा परेकी छन् ।

संसदका नेतृत्वमाथि यौन शोषणको आरोप लगाएपछि उनलाई नाइजेरियाको संसदले ६ महिनाका लागि निलम्बन गरेको अलजजिराले उल्लेख गरेको छ ।

उनलाई बिहीबारदेखि नै संसद प्रवेशमा रोक लगाइएको छ भने उनको भत्ता तथा सुरक्षा पनि कटौती गरिएको छ । यद्यपि अध्यक्ष अक्पाबियोले भने आफूमाथिको आरोप अस्वीकार गरेका छन् ।

बुधबार संसदको आचारसंहिता समितिले प्रक्रियागत नियमको उल्लंघन गरेको भन्दै अक्पाबियोमाथिको आरोपको उजुरी लिन अस्वीकार गरेको थियो । यद्यपि यो उनको निलम्बन भने यसअघि उनले संसदमा स्थान परिवर्तन गरेको विषयका कारण गरिएको भनेर दाबी गरिएको छ ।

गत फेब्रुअरी ७ मा नाइजेरियाको १०९ मध्ये ४ जना महिलामध्येकी सांसद युडआगनले एक टीभी अन्तरवार्तामा अध्यक्ष अक्पाबियोले ईच्छाविपरीत यौन फाइदा लिन खोजेकोबारे बोलेकी थिइन् । ‘यो अन्याय टिक्नेछैन’, उनले भनेकी थिइन् ।

उता अध्यक्ष अक्पाबियोले आफूले नताशालाई कुनै पनि गलत नगरेको भनेर सार्वजनिक रुपमा दाबी गरेका छन् ।