सुर्खेत । छात्रालाई आपत्तिजनक म्यासेज पठाएको आरोप लागेपछि सल्यानको कपुरकोट गाउँपालिकास्थित कालिका माध्यमिक विद्यालयका प्रधानाध्यापक चुडामणि केसीले राजीनामा दिएका छन् ।
विद्यालयमा अध्ययनरत कक्षा १० की छात्राले प्रधानाध्यापक केसीले अश्लील म्यासेज पठाएको भन्दै गाउँपालिकामा उजुरी दिएकी थिइन् ।
उजुरीपछि गाउँपालिकाले स्पष्टीकरण माग्दै निलम्बनको प्रक्रिया अघि बढाए पछि प्रधानाध्यापकले स्पष्टीकरण दिनुअघि नै पदबाट राजीनामा दिएका हुन् ।
गाउँपालिका उपाध्यक्ष तथा न्यायिक समिति संयोजक प्रकाश भण्डारीका अनुसार उजुरी परेपछि प्रधानाध्यापकलाई स्पष्टीकरणसहित निलम्बन गर्न पत्राचार गरिएको थियो ।
‘प्रधानाध्यापकले पठाएको म्यासेज दोहोरो अर्थ लाग्ने खालको पाइएपछि कारबाही प्रक्रिया अघि बढाइएको हो’, उनले भने ।
विद्यालय व्यवस्थापन समितिका अध्यक्ष मीनबहादुर सेनले प्रधानाध्यापक केसीले तीन दिनअघि नै राजीनामा बुझाएको जानकारी दिए ।
‘गाउँपालिकाले पत्राचार गरेपछि उहाँले स्वेच्छिक रूपमा पद त्याग्नुभयो’, सेनले बताए ।
यस विषयमा प्रधानाध्यापक केसीले भने आफूले गलत नियत नराखेको दाबी गर्दै आएका छन् । ‘छात्रालाई सकारात्मक सन्देश पठाएको थिएँ, तर राति पठाउनु गल्ती भयो’, केसीले भनेका छन् ।
विद्यालय व्यवस्थापन समितिले वामदेव अधिकारीलाई नयाँ प्रधानाध्यापकको रूपमा नियुक्त गरेको छ ।
Leave a Reply