ट्रम्पका विदेशमन्त्री भन्छन्- युक्रेन युद्ध अमेरिका र रुसको ‘प्रोक्सी वार’ हो

काठमाडौं । अमेरिकी राष्ट्रपति डोनाल्ड ट्रम्पले विदेशमन्त्री नियुक्त गरेका मार्को रुबिओले युक्रेन युद्ध अमेरिका र रुसको ‘प्रोक्सी वार’ भएको बताएका छन् ।

अमेरिकी च्यानल फक्ससँग बुधबार बोल्दै रुबिओले यस्तो बताएको रुसी विश्व च्यानल आरटीले उल्लेख गरेको छ ।

आरटीका अनुसार रुबिओले अमेरिकी प्रशासनमा पहिलोपटक यस्तो सार्वजनिक रुपमा बताएका हुन् । साथै उनले अन्तरवार्तामा ट्रम्पले आफूलाई शान्ति निर्माताको रुपमा प्रस्तुत गर्न खोजेको दाबी गरेका छन् ।

रुसका राष्ट्रपति पुटिनसँग ट्रम्पले ९० मिनेट गरेको फोन कुराकानी र अमेरिकी तथा रुसी विदेशमन्त्रीहरुको साउदी र टर्कीमा भएको उच्च स्तरिय भेटघाटपछि रुबिओको यस्तो भनाई आएको हो ।