नारायणकाजीको जिकिर- देउवा सँगै राखेर ओलीले भ्रष्टाचारमा थुन्ने देखेपछि मिल्यौँ भनेर स्वीकारिसके

काठमाडौं । नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले कांग्रेस र एमालेले भ्रष्टाचारीको संरक्षण गर्न मिलेर सरकार बनाएको आरोप लगाएका छन् ।

चितवनको कार्यकर्ता प्रशिक्षण कार्यक्रमलाई सम्बोधन गर्दै प्रधानमन्त्री ओलीले सार्वजनिक रूपमै प्रचण्ड सरकारले भ्रष्टाचारी भनेर थुन्ने भएपछि कांग्रेस-माओवादी गठबन्धन ढालेको बताएको जिकिर गरे ।

त्यसबारे उनको भनाइ यस्तो थियो

हामीले ललिता निवास, बाँसबारी छाला जुत्ता कारखानाको जग्गाको अनुसन्धान अघि बढायौं । कांग्रेस सरकारले ०४६ सालको परिवर्तनपछि सबै सरकारी उद्योग धन्दाहरू, कलकारखानाहरू सबै निजीकरण गरिदियो । त्यसको अनुसन्धान गरेर हामीले कारवाही प्रक्रिया अघि बढायौं । सुन तस्करीमा पनि सबैलाई कारवाही गरेका थियौं । देशभर सरकारी जग्गा मिचिएको फिर्ता ल्याउने काम थालेका थियौं ।

सरकारले काम गर्न थालेपछि सबैमा आशा पलाएको थियो । त्यो देख्न नसकेका दलालहरूले हाम्रो सरकार ढाले, हामीले व्यवहारिक प्रमाणद्वारा पुष्टि गर्दै गइरहेका थियौं । तर, अहिलेको प्रधानमन्त्रीले शेरबहादुर देउवालाई अगाडि राखेर विराटनगरमा भएको एउटा कार्यक्रममा पहिलेको सरकारले हामीलाई भ्रष्टाचारी भनेर थुन्ने भयो त्यसैले हामीले सरकार ढालेर हाम्रो बनाएका हौं भनेर खुलेरै सार्वजनिक रूपमा भन्नुभयो । त्यसबाट हाम्रो सरकार किन ढालियो भन्ने प्रष्ट हुन्छ ।