काठमाडौं। महाशिवरात्रिको अवसर पारेर यहीँ फागुन १४ गते बाट रिलिजको तयारीमा रहेको चलचित्र मायावीले ‘यूनिभर्सल’ सर्टिफिकेट पाएको छ।
चलचित्र जाँच पास समितिले चलचित्रलाई ‘यूनिभर्सल’ सर्टिफिकेट दिएसँगै अब यो चलचित्र हरेक वर्गका दर्शकले हेर्न पाउनेछन् ।
चलचित्रमा निर्देशक दिवाकर भट्टराईको लेखन तथा निर्देशन छ । लभ स्टोरी जनरामा बनेको यो चलचित्रमा नायक पल शाह र नायिका दीपिका प्रसाँईसंगै कलाकारद्वय प्रशान्त ताम्राकार, सुशील सिटौला, करिश्मा श्रेष्ठ र नव–नायक समीम खानको मुख्य भूमिका छ ।
रिलिज मिति नजिकिएसँगै यतिबेला ‘मायावी’ को प्रचारप्रसार पनि धमाधम भइरहेको छ।देशका विभिन्न १२ शहरमा ‘अटो रिक्सा’ बाट निर्माण टिम चलचित्रको प्रचारप्रसार गरिरहेको छ।
चलचित्रका कार्यकारी निर्माता करण सिंहका अनुसार चलचित्रको प्रचार पूर्वदेखि पश्चिमका मुख्य शहरहरुमा भइरहेको छ भने पूर्वका मुख्य शहरहरु धरान, इटहरी, विराटनगर, दमक र विर्तामोडमा माइकिङ पब्लिसिटी सुरु गरिएको छ।
दर्शकलाई चलचित्रको बारे प्रत्यक्ष जानकारी दिनका लागि यस्तो प्रचार शैली अपनाइएको सिंहको भनाई छ। यस्तै, चितवनदेखि बुटवल, पोखरा, दाङ, नेपालगञ्ज, भैरहवा, धनगढी लगायतका शहरमा पनि माइकिङ प्रचार शैली अपनाइएको छ ।
Leave a Reply