बाइडेन प्रशासनताका ९ हजार नेपाली गैरकानूनी रुपमा अमेरिका प्रवेश गरेको खुलासा

काठमाडौं । बाइडेन सत्ताकालको चार वर्षमा ९ हजार नेपाली दक्षिणी सिमानाबाट अमेरिका प्रवेश गरेको खुलासा भएको छ । अमेरिकाको होमल्यान्ड सेक्युरिटीले जारी गरेको तथ्यांकमा यस्तो देखिएको हो ।

बाइडेनभन्दा अगाडि डोनाल्ड ट्रम्पको चार वर्षे कार्यकालमा भने १ हजार ८५० नेपाली अवैध रुपमा अमेरिका प्रवेश गरेको अमेरिकाबाट प्रकाशन हुने नेपयोर्कले उल्लेख गरेको छ ।

नेपालमा तल्लो बाटो भनेर कुख्यात रुट प्रयोग गरेर मेक्सिकोको सिमानाबाट अमेरिका छिर्ने नेपालीहरुले करोड हाराहारी रकम बुझाएर पुग्ने गरेका खबर सार्वजनिक भएका छन् । यसरी अमेरिका पुगेकाहरुलाई यस अगाडि नै पनि १०० जनाभन्दा धेरैलाई नेपाल फर्काइएको पाइएको छ ।

डोनाल्ड ट्रम्पले सीमा नाकामा संकटकाल घोषणा गरेर सेना परिचालन गर्नासाथ बाइडेन कालमा दैनिक चार हजार हाराहारी अवैध रुपमा अमेरिका छिर्दै आएकोमा अहिले घटेर दैनिक ६०० भन्दा कम पुगेको अमेरिकी च्यानल फक्सले उल्लेख गरेको छ ।