के हो सांसद एलपी सावा लिम्बुलाई सटल भ्यानबाट प्लेन नचढाइ फर्काइएको प्रकरण ?

काठमाडौं । झापाको भद्रपुरका लागि जहाजमा उड्ने समयमा सटल भ्यान चढेर विमानस्थल भित्र आधी बाटो पुगेपछि फर्किनु परेकाे सांसद एलपी साँवाले गुनासो गरेका छन् । यति एयरलाइन्सबाट भद्रपुर जान विमानस्थलमा भ्यान चढेर जाँदै गर्दा जहाजको ढोका बन्द भएपछि  फर्काइएको भन्दै उनले सामाजिक सञ्जालमा उल्लेख गरेका छन् ।

उनको शुक्रबार एटी ९२५ मा बिहान १० बजेर ५ मिनेटमा उडान थियो । भीआईपीबाट बोर्डिङ च्यातेर करिब १० बजेर १८ मिनेटमा मारुती सटल भ्यानमा राखेर लिम्बुलाई जहाज भएको ठाउँमा लगिँदै थियो । तर, विमानस्थल भित्रबाट भ्यान चढेर जहाज भएको ठाउँमा जाँदाजाँदै जहाजको ढोका बन्द भयो र उड्यो ।

‘म सटल भ्यानमा चढेर जहाज भएको ठाउँमा पुग्नै लाग्दा जहाजको ढोका बन्द भयो भनेर भ्यानको चालको सञ्चार सेटमा खबर आयो । एयर क्राफ्ट भएको छेउमा पुग्नै लाग्दा भ्यानको ड्राइभरले बोकेको सञ्चार सेटमा अचानक डोर क्लोजको सूचना आयो र मलाई फर्काएर एराईभल तिर झारियो । धेरै साथीहरुलाई प्लेनमा प्राविधिक समस्या आयो उडान नभएर फर्काएको त सुनेको थिएँ । मेरो केस भने अलि फरक रह्यो । मलाई भीआईपीमार्फत सटल भ्यानमा चढाएर प्लेन देखाएर फर्काइयो’, संसद् लिम्बुले लेखेका छन् ।

उनले यो हेपाह प्रवृत्ति भएको भन्दै आक्रोश व्यक्त गर्दै यस प्रकारको यति एयरको लापरबाही र गैर जिम्मेवारपन उचित नरहेको बताए ।

यति एयरलाइन्सका प्रवक्ता सुदर्शन बर्ताैलाले भने संसद् लिम्बु समयमा नै नआइपुगेकाले जहाज छुटेको बताए ।

उनले भने, ‘माननीय लिम्बुलाई डिउटी अफिसरले धेरै पटक फोन गरेका थिए । उहाँले आउँदै छु भन्नु भएको थियो । जहाज उड्नुभन्दा अघि नै विमानस्थल आइपुग्नु पर्ने हो । तर, संसद् लिम्बु ढिलो आइपुग्नु भयो । हामीले भीआईपीका लागि भनेर भ्यान रेडी बनाएर राखेका थियौँ । उहाँ आइपुग्ने बित्तिकै भ्यानमा राखेर जहाज भएको ठाउँ तर्फ लगिँदै थियो । तर, ढोका बन्द भएको सूचना आयो । संसद् लिम्बु नै समयभन्दा ढिलो आइपुग्नु भएकाले भ्यानमा चढाएर लाँदा पनि नभ्याएको हो । उडान रोक्दा अर्को उडान कति बेला हुन्छ भन्ने नै ठेगान हुँदैन ।’