काठमाडौं । वरिष्ठ अधिवक्ता दिनेश त्रिपाठीमाथि बुधबार हातपात गर्ने व्यक्ति अहिले प्रहरी हिरासतमा छन् । उनले आफ्नो नामबाहेक केही पनि परिचय खुलाएका छैनन् ।
स्वर्णलक्ष्मी सहकारीको बचत अपचलनसम्बन्धी मुद्दामा प्रतिवादी बनाइएका रास्वपा सभापति तथा पूर्वगृहमन्त्री रवि लामिछानेको विषयमा थुनछेक बहस सकिएपछि वरिष्ठ अधिवक्ता त्रिपाठीमाथि सामान्य हातपात भएको थियो ।
जिल्ला अदालत, काठमाडौंको हाताभित्रै त्रिपाठीमाथि हातपात गर्ने ४८ वर्षीय ललीत केसी हुन् । उनी दोलखा जिल्लाको तामाकोशी गाउँपालिका-१ का स्थायीवासी हुन् । ललितपुर, टीकाथलीमा डेरा गरी बस्ने उनले हालसम्म आफ्नो काम, पेशा वा व्यवसाय बताएका छैनन् ।
‘हेर्दा अति सामान्य युवा छन्, के गर्छन् भन्ने कुरा भनेका छैनन्’, जिल्ला प्रहरी परिसर, काठमाडौंका प्रवक्ता एसपी नवराज अधिकारीले बताए ।
बुधबार साँझ बबरमहलस्थित जिल्ला अदालतनजिकैबाट उनी पक्राउ परेका हुन् । आजमात्रै उनको म्याद थप गरिँदैछ । उनलाई प्रहरी वृत्त सिंहदरबारको हिरासतमा राखिएको छ ।
जाहेरवालाको तर्फबाट बहस गर्न जिल्ला अदालत पुगेका वरिष्ठ अधिवक्ता त्रिपाठीले बहस सिध्याएर बाहिरिने क्रममा उनीमाथि हातपात प्रयास भएको थियो । उनले रविमाथि हदैसम्मको कारवाही हुनुपर्ने माग राख्दै बहस गरेका थिए ।
Leave a Reply