शेरा दरबारको जग्गाबारे प्रचण्ड- भ्रष्टाचारीले कुरुप बनेको आफ्नो अनुहार ढाक्न झूटा प्रचार गर्दैछन्

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नुवाकोटको शेरा दरबार जग्गा प्रकरणमा आफ्नो नाम जोडेकोप्रति आपत्ति जनाएका छन् ।

झापामा आयोजित माओवादीको खबरदारीसभालाई सम्बोधन गर्दै उनले सो जग्गा प्रकरणमा आफ्नो नाम जोड्नु भनेको बेइमानीपूर्ण कुरामात्रै भएको बताए ।

उनले भने, ‘अहिले अनौठो प्रचार भइरहेको छ । १२-१५ वर्षअघि पार्टी छाडिसकेको व्यक्तिको जग्गाको विषयलाई ल्याएर माओवादीसँग बसेको मान्छेको जग्गा रहेछ यो भनेर नुवाकोटको शेरा दरबारको कुरा ल्याइएको छ । योभन्दा लाजमर्दो र बेइमानीपूर्ण कुरा केही हुनै सक्दैन ।’

प्रचण्डले भ्रष्टाचारविरुद्धको अभियानको क्रममा आफ्नै पार्टीका नेताहरु देखिए पनि छुट दिने पक्षमा आफू नरहेको र नदिएको पनि दाबी गरे ।

उनले भने, ‘मैले सीआईबी र अनुसन्धान टोलीलाई अनुसन्धान गर्दै जाँदा प्रचण्ड नै आए पनि नछाड्नुस् भनेको थिएँ । त्यस्तो भन्ने पहिलो प्रधानमन्त्री म नै हो, तर यी भ्रष्टहरु आफ्नो भ्रष्टाचारीले कुरुप बनेको अनुहार ढाकछोप गर्न झुटा प्रचारको गर्दैछन् । म सरकारलाई चुनौती दिन्छु, शेरा दरबारको जग्गा सरकारको हो भने तुरुन्तै सरकारको नाममा ल्याउँ, मेरो पूरै साथ हुन्छ, तर झूटो प्रचार गरेर बेइमानी नगर ।’