‘भीम रावलले पार्टी अध्यक्षसहित कसैको कुरा सुन्नुभएन, पराजित भएपछि आफूले भनेकै पद पाइँदैन’

काठमाडौं । पूर्वउपाध्यक्ष रहेका भीम रावलसहित तीन नेतालाई कारबाही गरेपछि नेकपा एमालेभित्र अहिले तरंग पैदा भएको छ । रावललाई पार्टीको साधारण सदस्यसमेत नरहनेगरी कारबाही गर्दा पार्टी नेतृत्वको निर्णयप्रति असहमति राखेका स्थायी कमिटी सदस्य विन्दा पाण्डे र केन्द्रीय सदस्य उषाकिरण तिमिल्सेना ६ महिनाका लागि निलम्बनमा परेका छन् ।

उनीहरुले पार्टी कार्यालयको भवन बनाउन व्यवसायी मीनबहादुर गुरुङसँग जग्गा दान लिने पार्टीको निर्णयप्रति असन्तुष्टि जनाएका थिए । पार्टीले सोधेको स्पष्टीकरणको जवाफ त दिएका थिए, तर अध्यक्ष केपी शर्मा ओली र महासचिव शंकर पोखरेलकै जोडबलमा उनीहरु कारबाहीमा परेको आरोप छ । 

सचिवालय बैठकमा रावललाई कारबाही गर्ने विषयमा कसैले असहमति नराखेको भए पनि पाण्डे र तिमिल्सेनाको हकमा भने कतिपय सचिवालयका सदस्य निलम्बन गर्न नहुने पक्षमा उभिएका थिए । उनीहरुले अध्यक्ष केपी शर्मा ओलीले नै बोलाएर छलफल गरेर कुरा मिलाउनुपर्नेमा जोड दिएका थिए, तर ओली आफ्नो निर्णयबाट पछि हटेनन् ।

दुई नेतामाथिको निलम्बनबारे पुनर्विचार गर्नुपर्ने धारणा राख्नेमध्येकी एक हुन्, उपाध्यक्ष अष्टलक्ष्मी शाक्य । तीन नेतामाथि कारबाहीको चरणमा पुग्नु र त्यसपछिको टीकाटिप्पणीको विषयमा  एमाले उपाध्यक्ष अष्टलक्ष्मी शाक्यसँग नेपालप्रेसले गरेको सवालजवाफः

– तपाईं आफैं सहभागी सचिवालयको बैठकले भीम रावलसहित तीन नेतालाई गरेको कारबाहीको विषयलाई लिएर विभिन्न टीकाटिप्पणी भइरहेको छ । त्यसलाई कसरी लिनुहुन्छ ?

हामी अहिले पार्टीलाई एकताबद्ध बनाएर अघि बढ्नुपर्छ भनेर लागिरहेका छौं । त्यसैले पार्टीलाई बलियो बनाउन अनुशासन आवश्यक छ । विधि र प्रक्रियामा सबै चल्नुपर्छ । बैठकले तीन जनालाई कारबाहीको निर्णय गरेको छ । भीम रावलजीको त लामै कुरा छ । त्यो सबैले देखिराख्नुभएकै छ ।

उहाँसँग अध्यक्षले पनि बोलाएर कुराकानी गर्नुभएकै हो, तर पनि उहाँले कसैको कुरा सुन्नुभएन । सल्लाहकारमा राखेको पनि स्वीकार्नुभएन । पराजित भएपछि त आफैंले भनेको जस्तो ठाउँ पाइँदैन नि ! उहाँ पार्टीले दिएको जिम्मेवारीअनुसार चलेको भए विस्तारै अरु त अघि बढिहाल्थ्यो नि !

तर अन्य दुई जनाको सवालमा निलम्बनको तहसम्म जान हुँदैनथ्यो भन्ने नै हो । उहाँहरुले गल्ती, कमीकमजोरी गरेकै भए पनि अध्यक्षले बोलाएर कुरा गर्नुपर्थ्यो । पार्टी भनेको एउटा परिवार नै हो नि ! त्यसैले अध्यक्षले बोलाएर सम्झाउनुभएको भए हुन्थ्यो । यो कुरा बैठकमा पनि उठेको थियो ।

तर दुवैतिर समस्या आयो । अध्यक्षमा पनि अगाडि पूरै निषेध गरेर जाने देखियो । उहाँहरु पनि पद्धतिलाई अंगाल्ने भन्दा पनि बाहिर बाहिर गइदिनुभयो । दुवैतिर समस्या देखिएकाले अहिलेको स्थिति देखापरेको हो ।

– यो कारबाहीले त एमालेमा नेतृत्वको निर्णयप्रति प्रश्नै उठाउन नपाइने देखियो नि होइन ?

यो निर्णयमा त अझै उहाँहरुसँग बसेर कुराकानी गरेर पुनर्विचार गर्नुपर्छ भन्ने नै लाग्छ । अब त्यो हुन्छ हुँदैन, थाहा छैन । अब हाम्रो केन्द्रीय कमिटीको बैठक पनि बस्दैछ । त्यो बैठकसम्म त पर्खिनुपर्छ भन्ने लाग्छ ।

– पार्टी सचिवालयले गरेको निर्णयलाई केन्द्रीय कमिटीको बैठकले उल्ट्याउन सक्छ र ?

त्यो त अहिल्यै भन्न सकिँदैन । अब बैठकमा यसबारेमा कसरी कुरा उठ्छ भन्नेमा निर्भर रहन्छ । यो विषयमा साथीहरुले कुरा उठाउनुहुन्छ भन्ने लागेको छ मलाई पनि । त्यसैले अब के हुन्छ भन्ने निर्णय बैठकले नै गरेपछि टुंगिन्छ । त्यसैले केन्द्रीय कमिटीको बैठकसम्म पर्खिनैपर्छ भनेको हुँ ।

– तपाईंको बुझाइमा यो कारबाहीलाई कतिको स्वाभाविक मान्नुभएको छ ?

पार्टीको विधि सबैले मान्नैपर्छ नि ! अहिले अरु पार्टीतिर त जान चाहन्न, तर हाम्रो पार्टीभित्र पनि अनुशासन कमजोर भएको छ । अराजकता पनि बढेको छ । पार्टी पार्टी जस्तो चल्नुपर्‍यो नि ! त्यसमा हामी सबैबाट कमजोरी नै भएको देख्छु म । उहाँहरुको कुरामात्रै होइन, आमरुपबाट पनि अनुशासन कमजोर भएको देखिएको छ ।

– तर पार्टी नेतृत्वको यही प्रवृत्तिले त एमालेलाई फाइदा गर्दैन भन्ने टीकाटिप्पणी भइरहेको छ नि ?

नोक्सान त भइहाल्छ नि ! त्यसैले हामीले वैचारिक काम गर्नुपर्छ, पार्टीभित्र प्रशिक्षण चलाउनुपर्‍यो । विचार कमजोर भयो भने अनेकौं समस्या पार्टीमा देखिन्छन् ।

अहिले जस्तै अराजकता निस्कन्छ । त्यसैले पार्टीभित्रका नेता कार्यकर्ताको विचार कमजोर नबनाउन वैचारिक कामहरु फटाफट गर्नुपर्छ । त्यसमा पार्टी नेतृत्व पनि सचेत भएर लाग्नुपर्छ ।