वर्षमानको प्रश्न: नियामक निकायमा सरकारसँग ट्युनिङ मिल्नेहरू हुँदा पनि किन अर्थतन्त्रमा सुधार भएन ?

काठमाडौं । नेकपा माओवादी केन्द्रका उपमहासचिव एवं पूर्वअर्थमन्त्री वर्षमान पुन अनन्तले सरकारले लगानीकर्तालाई विश्वासमा लिन नसकेका कारण अर्थतन्त्रको शिथिलता अन्त्य हुन नसकेको बताएका छन् ।

प्रतिनिधिसभाको अर्थसमिति बैठकमा बुधबार उनले सरकार अर्थतन्त्र चलायमान बनाउन चुकेको बताए ।

नियामक निकायका पदाधिकारीहरू वर्तमान सरकारको नेतृत्वमा रहेका दलसँग ट्युनिङ मिल्ने व्यक्तिहरू नै रहेको चर्चा गर्दै उनले त्यसका परिणाम अर्थतन्त्रमा देख्न नपाइएको उल्लेख गरे । ‘नेपाल राष्ट्रबैंक, धितोपत्र बोर्ड र बिमा प्राधिकरणजस्ता नियामक निकायले अर्थतन्त्र चलायमान बनाउन भूमिका निर्वाह गर्छन्’, पुनले प्रश्न गरे, ‘ती निकायको नेतृत्वमा अहिलेको सरकारसँग ट्युनिङ मिल्नेहरू नै छन् । तर, किन रिजल्ट आएन रु आन्तरिक र बाह्य लगानीकर्तामा कन्फिडेन्स किन छैन ?’ । उनले बैठकमा सहभागी अर्थमन्त्री विष्णुप्रसाद पौडेललाई त्यस विषयमा गम्भीर बन्न आग्रह गरे ।

पुनले आफू अर्थमन्त्री भएका बेला बिमा प्राधिकरणका अध्यक्ष सूर्यप्रसाद सिलवालको नागरिकताबारे प्रश्न उठेपछि राजीनामा मागे पनि उनले नियामक निकायका नाममा आफ्नो आग्रह अस्वीकार गरेको बताए । नागरिकतामा फरकफरक तीनवटा मिति फेला परेपछि सिलवालविरुद्ध अख्तियार दुरुपयोग अनुसन्धान आयोगले केही दिनअघि मुद्धा दायर गरेको छ । फरक प्रसङ्गमा पुनले प्राथमिकता निर्धारणका नाममा सरकारले पूर्ववर्ती सरकारले अघि सारेका ठुला विकास आयोजनाका बजेट कटौती गर्ने तयारी गरेको सुन्नमा आएको भन्दै त्यसो नगर्न सचेत गराए । ‘नयाँ प्राथमिकता निर्धारण गर्ने नाममा मैले अघि सारेका ठुला आयोजनाको बजेट कटौती गर्ने तयारी भइरहेको छ भन्ने सुन्नमा आएको छ’, उनले भने, ‘यस्तो तरिकाले खर्चको प्याटन बिगार्छ । बजेटमा राखिएका आयोजनाको कार्यान्वयन गरिनुपर्छ ।’

पुनले निष्पक्ष भएर काम गर्दा मात्र व्यावसायिक र लगानीमैत्री वातावरण बन्ने भन्दै मनोमानी नगर्न सरकारलाई चेतावनी दिए ।