काठमाडौं । गत हप्ता आएको बाढी-पहिरोको ठूलो विपत्तिले अत्यधिक प्रभावित बनेको जिल्ला काभ्रेपलाञ्चोकको पिपलचौरमा खानेपानीको समस्यामा परेका स्थानीयलाई गायक तथा मोडल दुर्गेश थापाले सहयोग गरेका छन् । सामाजिक कार्यमा सक्रिय `हाम्रो टिम नेपाल´को समन्वयमा नयाँ पाइप जडान गरेर खानेपानीको सहज आपूर्तिको लागि दुर्गेशले नगद ५० हजार सहयोग गरेका हुन् ।
सामाजिक सञ्जालमा जानकारी पोस्ट गर्दै दुर्गेशले ‘बाढीपहिरोले काभ्रे पिपलचाैरमा पाईप बगाएर खानेपानीबाट बञ्चित बनेका स्थानीयहरूलाई खानेपानीको सहजताको लागि व्यक्तिगत तर्फबाट ५० हजार सहयोग गरेको’ उल्लेख गरेका छन् ।
‘अफ्ट्यारोमा परेकाहरूको दु:खमा मल्हम लगाउनु हामी सबैको कर्तव्य हो, म सहितको सहयोग मद्दतमा नयाँ पाईप जडान गरेर अहिले उक्त स्थानमा खानेपानीको सहजता पुगेको छ,’ उनले लेखेका छन् ।
यसअघि पनि धेरै व्यक्ति र क्षेत्रमा आफ्नो तर्फबाट सक्दो सहयोग गर्दै आइरहेको उनले बताए ।
`दु:खमा लगाउने मल्हमलाई प्रचारको हतियार बनाउन मन लाग्दैन दुर्गेश भन्छन्, ‘आज अरूलाई परेको अफ्ट्यारो भोलि जसलाई पनि पर्नसक्छ, समस्यामा परेकाहरूसँग हातेमालो गर्दै अघि बढ्नु नै मानवता हो।’
दुर्गेश यतिबेला दशैंको अबसरमा विभिन्न ठाउँमा आयोजित सांगीतिक कार्यक्रममा व्यस्त रहेका छन् । भैरहवा, लमजुङ, तनहुँ र चितवनको कार्यक्रम सकेर आज नवलपुरको कार्यक्रममा पुगेक उनले जानकारी दिए ।
दशैं योजना सुनाउँदै चितवनबाट दुर्गेशले भने, ‘नवलपुरपछि गोरखाको कार्यक्रम सकेर पोखरा हुँदै बाग्लुङ रहनेछु ।’
Leave a Reply