दक्षिण भारतीय अभिनेता चिरञ्जीवीले राखे गिनिज वर्ल्ड रेकर्ड

काठमाडौं । दक्षिण भारतीय अभिनेता चिरञ्जीवीले गिनिज बुक अफ वर्ल्ड रेकर्डमा आफ्नो नाम दर्ता गराएका छन । ४५ वर्षको अभिनय करिअरमा १५६ चलचित्रका ५३७ गीतमा डान्स गरेर उनले आफ्नो गिनिज वर्ल्ड रेकर्डमा दर्ता गराएका हुन् ।

चिरञ्जीवीलाई अभिनेता आमीर खानले यो अवार्डबाट सम्मान गरेका थिए । आमीरले आफू चिरञ्जीवीको ठूलो फ्यान भएको बताउँदै उनको डान्स मुभ्सको समेत तारिफ गरे ।

आमीरले भने, ‘यदि तपाईंले उनको कुनै पनि गीत हेर्नुभयो भने उनको हृदय नृत्यमा डुबेको थाहा पाउनुहुनेछ । हामीले उनीबाट नजर हटाउँदैनौं किनभने उनले निकै राम्रो अभिनय गर्छन् ।’

सन् १९७९ मा फिल्म ‘पुनाधिरल्लु’बाट अभिनय करिअर सुरु गरेका चिरञ्जीवीलाई सन् १९८३ मा रिलिज भएको फिल्म ‘कैदी’ले रातारात सुपरस्टार बनायो । त्यसबेलादेखि उनलाई मेगास्टार चिरञ्जीवीले चिन्ने गरिन्छ।

‘पुनाधिरल्लु’बाट अभिनय यात्रा सुरु गरे पनि बापूद्वारा निर्देशित ‘मन वुरी पाण्डाभुलु’ उनको पहिलो रिलिज फिल्म थियो ।

अभिनयसँगै चिरञ्जीवी राजनीतिमा पनि सक्रिय थिए । सन् २००८ मा आन्ध्र प्रदेश राज्यको दल प्रजा राज्य पार्टीबाट उनले राजनीतिक करिअर थालेका हुन् । पार्टी स्थापनाका क्रममा उनले सामाजिक न्याय आफ्नो पार्टीको मुख्य एजेण्डा रहेको बताएका थिए ।

सन् २००९ को आमचुनावमा उनको पार्टीले आन्ध्र प्रदेश विधानसभामा २९४ मध्ये १८ सीट जितेको थियो । अहिले भने उनी राजनीतिमा सक्रिय छैनन् ।