काठमाडौं । बैंकिङ कसुरका एक आरोपी जाहेरवाला मिटरब्याजी भन्दै जिल्ला प्रशासन कार्यालय पुगेका छन् । जिल्ला प्रशासन कार्यालयको पत्रपछि प्रहरीले अनुसन्धान थालेको थियो ।
काठमाडौं जिल्ला प्रहरी कार्यालयले अनुसन्धान गरेपछि जिल्ला अदालतमा सिन्धुपाल्चोकको इन्द्रावतीका २७ वर्षीय सुजन हिमालयविरुद्ध अनुचित लेनदेन (मिटरब्याजी) कसुरमा मुद्दा दायर भएको छ । सर्जु महर्जनले सुजनविरुद्ध मिटरब्याजीको आरोप लगाउँदै उजुरी दिएकी थिइन् ।
त्यसअघि सुजनले सर्जुविरुद्ध २१ लाख ६० हजार रूपैयाँ बराबरको चेक बाउन्स गरी जाहेरी दिएका थिए । त्यसपछि सर्जुविरुद्ध अदालतमा मुद्दा दायर भएको थियो ।
सर्जुले सुजनसँग १४ लाख रूपैयाँ ऋण लिएकामा २८ लाख रूपैयाँ लिएको भनेर दाबी गरेको र आफूलाई डर त्रास देखाएर २१ लाख ६० हजार रूपैयाँ बराबरको दुईवटा चेक काट्न लगाएको दाबी गरेका छन् । काठमाडौं जिल्ला प्रशासनले यस विषयमा दुवै पक्षलाई राखेर छलफल गराएपनि सहमति हुन नसकेपछि मुद्दाको प्रकृयामा जान प्रहरीलाई पत्राचार गरेको थियो ।
सर्जुका अनुसार उनले सुजनसँग डेढ वर्षअघि व्यापार प्रयोजनका लागि एकपटक ४ लाख र त्यसपछि दुई पटक ५/५ लाख रूपैयाँ लिएको बताएका छन् । त्यसमध्ये करिब ८ लाख रूपैयाँ बैंक खाता र वालेटमा पठाएको तथा ५ लाख ५० हजार रूपैयाँ नगदै फिर्ता गरेको उनको दाबी छ ।
सुरूमा लिएको ४ लाखको ६० प्रतिशत ब्याजदर र १० लाख रूपैयाँको साताको ५० हजार रूपैयाँको दरले हिसाब गरेर आफूसँग २१ लाख ६० हजार रुपैयाँको चेक काट्न लगाएको उनले उजुरीमा उल्लेख गरेका थिए । यता सर्जुले सुरूमा ६ लाख, त्यसपछि ५/५ लाख र चौथोपटक ३ लाख रूपैयाँ लिएको सुजनको दाबी छ । त्यसमध्ये सर्जुले करिब ६ लाख रूपैयाँमात्र फिर्ता गरेको उनले बयानका क्रममा बताएका छन् ।
Leave a Reply