डीएसपीको परिवार नै उडाइदिने धम्की दिने खगेनसिंह बने कोशीको सहकारी मन्त्री

विराटनगर । जिल्ला प्रहरी कार्यालयका तत्कालीन प्रमुख प्रहरी नायब उपरीक्षक राजन लिम्बू र उनको परिवारलाई उडाइदिने धम्की दिएका कांग्रेस सांसद खगेनसिंह हाङगाम कोशी प्रदेशको मन्त्री भएका छन् ।

ताप्लेजुङका खगेन उद्योग कृषि तथा सहकारीमन्त्री नियुक्त भएका छन् । कांग्रेस सभापति शेरबहादुर देउवानिकट हाङ्गाम ताप्लेजुङको निर्वाचन क्षेत्र नम्बर १ ‘ख’ बाट निर्वाचित सांसद हुन् ।

ताप्लेजुङका तत्कालीन प्रहरी प्रमुख डीएसपी राजन लिम्बू र उनको परिवारलाई लक्षित गरेर सार्वजनिक मञ्चबाट ज्यान मार्ने धम्की दिएका थिए । २०८० साल भदौ २२ गतेको मेलामा भएको विवादका विषयमा दिएको धम्कीले उनी चर्चामा आएका थिए ।

हेर्नुस् त्यो बेलाको भिडओ

ताप्लेजुङको फुङलिङमा आयोजित मिनी मेलामा सांसद हाङ्गाम र डीएसपी लिम्बूबीच भदौ २१ गते विवाद भएको थियो । विवादपछि त्यसको भोलिपल्ट हाङगामले फुङलिङमा कोणसभाको आयोजना गरेर डीएसपी र उनका परिवारलाई लक्षित गरी ज्यान मार्ने धम्की दिएका थिए ।

यो पनि पढ्नुहोस्- कांग्रेस सांसदको आपत्तिजनक अभिव्यक्ति, डीएसपीका परिवारलाई समेत खोजेर मार्ने धम्की (भिडिओ)

सांसदले ज्यान मार्ने धम्की दिएकामा प्रहरीले आपत्ति प्रकट गरेको थियो । प्रहरीले कोशी प्रदेश प्रहरी कार्यालय विराटनगरका तत्कालीन एसपी ऋषिराम कँडेलको नेतृत्वमा छानबिन समिति बनाएको थियो । हाङगामले डीएसपी र उनका परिवारको ज्यान लिने धम्की दिएको घटनाका विषयमा छानबिन भए पनि मिलापत्र गराइएको थियो । पहुँचका भरमा सो घटना मिलाएर उनले उन्मुक्ति पाएका थिए ।

सो घटनामा पनि कांग्रेसले हाङगामको बचाउ गरेको थियो । उनले दिएको अभिव्यक्ति गलत भए पनि वातावरण बिगार्ने काम प्रहरीबाटै भएको भन्दै कांग्रेसले डिफेन्स लिएको थियो । प्रहरीले सादा पोसाकमा गएर व्यक्तिको घर तोडफोड गरेको, ढोका बाहिर निकालेको, कुटपिट गरेको र गुन्डागर्दी शैली अपनाएको आरोप कांग्रेसको थियो ।

यो पनि पढ्नुहोस्- सांसदले डीएसपीको परिवारसहितको ज्यान लिने धम्कीपछि अनुसन्धान हुँदै