काठमाडौं । दोस्रो विश्व युद्धमा ज्यान गुमाएकाहरूको सम्मानमा आयोजना हुने नेदरल्याण्डको एक प्रतिष्ठित काव्य कन्सर्टमा नेपाली कविले प्रस्तुति दिएकी छिन् ।
सेप्टेम्बर १२ मा भएको लिबरेसन कन्सर्ट नामक कार्यक्रममा नेपाली कवि परिधि भण्डारीले प्रस्तुति दिएकी छिन् । ४ हजार हाराहारी प्रतिष्ठित अनुहारहरू उपस्थित हुने मार्ग्रातेन क्षेत्रमा हुने कार्यक्रममा डच प्रधानमन्त्री पनि सहभागी थिए ।
कार्यक्रमलाई अमेरिकी टिभीमा लाइभ प्रस्तुति पनि भएको थियो । परिधीलाई उनले अध्ययन गर्ने शैक्षिक संस्था यूनाइटेड वल्र्ड कलेज (यूडब्लूसी)को तर्फबाट स्थान दिइएको आयोजकले सार्वजनिक गरेको जानकारीमा बताइएको छ ।
उनले आफ्नो कविता ‘विस्पर्स फ्रम मार्ग्रातेन’ अर्थात् ‘ मार्ग्रातेनबाट साउती’ शीर्षक कविता वाचन गरिन् । उनको अंग्रेजी भाषामा लेखिएको कविताको डच अनुवाद आयोजकले कार्यक्रमको ब्रोसरमा राखेका छन् ।
यूडब्लूसीका एक हजार अन्तर्राष्ट्रिय विद्यार्थीहरूबाट छानिएर परिधीले कविता वाचन गर्न पाउने भएकी छिन् । परिधीको परिचय दिँदै आयोजकले लेखेको छ, ‘परिधी एक मेधावी विद्यार्थीहरूमा एक हुन् ।’
झापा गौरादहकी परिधी भण्डारी जेभियर इन्टरनेशनल स्कूलबाट उच्च माध्यमिक तहसम्म अध्ययन गरेपछि युडब्लुसीको विद्यार्थीका रुपमा नेदरल्याण्डमा अध्ययनरत छिन् । यस्तो समारोहमा प्रस्तुति दिने उनी पहिलो नेपाली विद्यार्थी हुन् ।
८० वर्ष अगाडी ज्यान गुमाएका अमेरिकी सैनिकहरूको स्मृतिमा कन्सर्ट आयोजना हुने गरेको छ ।
यो स्थानमा १० हजार अमेरिकी सैनिकहरूको चिहान रहेको छ । यो अमेरिकाको नेदरल्याण्डमा भएको एक्लो कपुरथान हो ।
Leave a Reply