चितवनको रातमाटे डाँडामा विपीनको ‘मरुभूमिमा वासन्ती याम’ लोकार्पण

चितवन । कवि विपीन पाठकको कविता संग्रह ‘मरुभूमिमा वासन्ती याम’ लोकार्पण गरिएको छ । कविता संग्रह कवि पाठक हुर्किएको माडीको जंगल रातमाटे डाँडामा चितवन, मकवानपुर र नवलपरासीका साहित्यकार तथा प्राज्ञिक व्यक्तिहरुको उपस्थितिमा लोकार्पण गरिएको हो ।

माडीको पर्यटकीय स्थल रातमाटे डाँडामा शुक्रबार साँझ गरिएको कार्यक्रममा माडी नगरपालिकाका प्रमुख ताराकुमारी काजी महतो, कवि पाठकका बाबुआमा बालकृष्ण पाठक, पार्वती पाठक, कवि भूपिनलगायतले संयुक्त रुपमा कविता संग्रह लोकार्पण गरेका हुन् ।

माडी साहित्य परिवारको आयोजनामा गरिएको कार्यक्रममा कवि पाठकको व्यक्तित्व एवं कृतिबारे डा. धनेश्वर भट्टराईले चर्चा गरेका थिए । प्रेम रिमाल, रामप्रसाद न्यौपाने, प्रकाश चापागाईं, पुरुषोत्तम आचार्यलगायतले पुस्तकका बारेमा चर्चा गरेका थिए ।

आफूले कवितामार्फत समाजमा चेतना तथा परिवर्तनका केही सन्देश दिने प्रयास गरेको कवि पाठकले बताए ।
सामाजिक तथा समाज रुपान्तरणसम्बन्धी ४० वटा कविता समेटिएको संग्रहको प्रकाशन इन्डिगो इन्क प्रालि काठमाडौंले गरेको हो ।