घण्टीघरबाट रविले भने- निर्मम समीक्षा गरेर अघि बढ्छौं (भिडिओ)

काठमाडौं । राष्ट्रिय स्वतन्त्र पार्टीका (रास्वपा)का सभापति रवि लामिछानेले सरकारमा सहभागी भएका एक सय दिनमा आफूहरूले मन्त्रालय सञ्चालन गर्ने बलियो आधार बनाएको बताएका छन्।

स्थापना दिवसको अवसरमा आयोजित चियापान समारोहमा सञ्चारकर्मीहरूसँग कुरा गर्दै जनताको अपेक्षा पूरा गर्ने चुनौतीका साथ आफूहरूले काम गर्ने बताए।

उनले भने, ‘२१ सीटले सदनमा हामी गज्जबको प्रतिपक्ष भएकै हौँ। सरकारमा एक सय दिन जति भएको छ। गज्जबले सरकार चलाउने आधार बनेका छन्। नागरिकको अपेक्षा ठूलो छ। त्यो पूरा गर्न ठूलो चुनौती छ। त्यसलाई ख्याल गरेर हामीले इमानदार कोसिस गर्छौँ।’

उनले आफू पुराना दलहरूभन्दा फरक भएको जिकिर गरे।

उनले भने, ‘हामी मासमा नै विश्वास गर्छौँ। पार्टीलाई सानो संरचना बनाएका छौँ। सबै विषयलाई महाधिवेशनअघि नै स्पष्ट पार्नु छ। केही कुरा जलेश्वर बैठकले संकेत गरेको छ। भर्खरै महामन्त्रीले समीक्षा यात्रा गरेर आउनुभएको छ। निर्मम समीक्षा हुन्छ भन्नुभएको छ। उहाँ आम नागरिकको प्रतिक्रिया सुनेर आउनुभएको छ। हामी मन्त्रालयमा छिरे पनि पार्टीको लेयर त घरघर गाउँमा छ हामीले जमिन त छाडेका छैनौँ। त्यहाँबाट आएका प्रतिक्रियाहरू निर्मम छन् भन्ने छ त्यसलाई समीक्षा गरेर अगाडि बढ्छौँ।’