काठमाडौं । प्रतिनिधि सभाको आजको वैठक तनावग्रस्त भइरहँदा कांग्रेस उपसभापति धनराज गुरुङ एमाले अध्यक्ष केपी शर्मा ओलीमाथि उत्तेजितरुपमा प्रस्तुत भए । चर्को स्वरमा नाराबाजी गरिरहेका गुरुङलाई सुरुमा ओलीले कोट्याएर केही भनेलगत्तै गुरुङले ओलीप्रति उत्तेजित हाउभाउ देखाएका थिए ।
आखिर ओलीप्रति धनराज किन आक्रोशित भएका थिए ? एक एमाले नेताका अनुसार गुरुङ गृहमन्त्रीलाई जसरी पनि रोक्ने ध्याउन्नमा थिए र ओलीले सम्झाउन खोज्दा उनी उत्तेजनामा आएका हुन् ।
‘गृहमन्त्रीलाई जान दिन्नँ, म जसरी नि रोक्छु । म रोक्छु, रोक्छु । कसले छेक्न सक्छ’, भन्दै गुरुङ प्रस्तुत भएका ती नेताले बताए ।
ओलीले घेराउ गर्ने ठाउँ यो नभएको (सत्तापक्षको रो) बताउँदा गुरुङ झन् आक्रोशित बनेका थिए । ‘यो शिष्टता भएन । यो तपाईंको ठाउँ होइन, अगाडि गएर घेराउ गर्नुस,’ ओलीको भनाइ उद्धृत गर्दै ति नेताले भने ।
त्यसक्रममा कांग्रेसका धनराज गुरुङले ओलीको नजिकै गएर औंला उझ्याउँदै अभद्र व्यवहार गरेका थिए ।
गुरुङ हात हाल्ने ढंगले प्रस्तुत भएपछि एमालेका प्रमुख सचेतक महेश वर्तौला,ठाकुर गैरे,रघुजी पन्त,सुर्य थापालगायत प्रतिवादमा उत्रिएका थिए । त्यसपछि हात हालाहाल भएको हो ।
संसदमा गृहमन्त्री लामिछानेलाई बोल्न सभामुख देवराज घिमिरेले बोलाएपछि कांग्रेसले नाराबाजी गर्दै रोक्न खोजेको थियो । त्यस क्रममा कांग्रेस र एमालेका सांसदहरुबीच धकेलाधकेल भएको थियो । त्यसपछि सभामुख घिमिरेले संसद स्थगित गरेका थिए ।
उता कांग्रेसले भने सभामुख घिमिरे एमालेको निर्देशनमा चलेको आरोप लगाएको छ भने आफूहरुले अभद्र व्यवहार नगरेको दाबी गरेको छ ।
Leave a Reply