१० वर्षअघि पहिलो टी-२० विश्वकप खेल्ने नेपाली टीमका सदस्य अहिले को कहाँ छन् ?

काठमाडौं । नेपालले १० वर्षपछि दोस्रो पटक टी–२० विश्वकप खेल्दै छ । आउँदो जुनमा हुने प्रतियोगिताका लागि नेपाली टोली त्यसतर्फ प्रस्थान गरिसकेको छ । नेपालले यसअघि २०१४ मा टी–२० विश्वकप खेलेको थियो । त्यसको १० वर्षपछि नेपालले विश्वकप खेल्न लागेको हो ।

नेपालले दोस्रो पटक विश्वकप खेल्न लाग्दा १० वर्षअघि खेलेका एक खेलाडी मात्र दोस्रो पटक विश्वकप खेल्दै छन् । दोस्रो पटक विश्वकप खेल्ने एक्ला नेपाली खेलाडी हुन्, सोमपाल कामी । उनी अहिले टोलीको मुख्य र अनुभवी खेलाडी हुन् ।

नेपालले २०१४ भएको टी–२० विश्वकपको पहिलो चरणमा नेपालले अफगानिस्तान र हङकङलाई पराजित गरेको थियो । घरेलु टोली बङ्गलादेशसँग मात्र पराजित भएको नेपाली टोली नेटरनरेटका आधारमा दोस्रो चरणमा पुग्न सकेको थिएन ।

त्यतिबेला नेपाली टोली पारस खड्काको कप्तानीमा थियो । १५ सदस्यीय टोलीका अन्य खेलाडीमा प्रदिप ऐरी, सुबास खकुरेल,अनिल मन्डल, ज्ञानेन्द्र मल्ल, अमृत भट्टराई, सोमपाल कामी, नरेश बुढाऐर, शरद भेषावकर,सागर पुन, शक्ति गौचन, बसन्त रेग्मी, राहुल विके, विनोद भन्डारी र जितेन्द्र मुखिया थिए। राहुल, अनिल, अमृत र प्रदिप ऐरी तीनवटै खेलमा बेन्चमा सिमित भएका थिए ।

कहाँ छन् विश्वकप खेलेका नेपाली खेलाडी ?

नेपालले विश्वकप खेल्ने तयारी गरिरहँदा अघिल्लोपटक विशवकप खेलेका दुई जना खेलाडी मात्र राष्ट्रिय टोलीमा पर्न संघर्षरत थिए । त्यसमध्ये सोमपाल कामीको स्थान लगभग पक्का थियो । नेपाल एका कप्तान रहेका विनोद भन्डारी भने ढुक्क थिएनन् ।

अन्ततः उनी १५ सदस्यीय राष्ट्रिय टोलीमा अँटाएनन् । विनोदले हालै वेस्ट इन्डिज एविरुद्ध खेलेका थिए । ३४ वर्षीय विनोदले हालसम्म नेपालका लागि ४० टी–२० अन्तर्राष्ट्रिय खेल्दै २ अर्धशतकसहित ४ सय ५ रन जोडेका छन् ।

विश्वकपमा नेपाली टोलीको कप्तानी गरेका पारस खड्का अहिले क्रिकेटको व्यवस्थापनतिर छन् । पारस गत असोजमा भएको निर्वाचनबाट नेपाल क्रिकेट संघ–क्यानको सचिव निर्वाचित भएका थिए। उनले सन् २०२० मा अन्तर्राष्ट्रिय क्रिकेटबाट सन्याश घोषणा गरेका थिए ।

पारसले नेपालका लागि ३३ टी–२० अन्तर्राष्ट्रिय खेल्दै एक शतक र ४ अर्धशतकसहित ७ सय ९९ रन जोडेका छन् । पारसपछि नेपाली टोलीको कप्तान बनेका ज्ञानेन्द्र मल्ल नेपाल ‘ए’ टीमको मुख्य प्रशिक्षकको रूपमा छन् । गत साउनमा क्रिकेटबाट संन्यास लिएका मल्ल फागुनमा ‘ए’ टिमको मुख्य प्रशिक्षक नियुक्ति भएका हुन् ।

ज्ञानेन्द्रले ४५ टी–२० अन्तर्राष्ट्रिय खेल्दै एक शतक र २ अर्धसतकसहित ८ सय ८३ रन जोडेका थिए । विनोदजस्तै जितेन्द्र मुखिया र शरद भेषावकर अहिले पनि घरेलु क्रिकेट खेल्दै छन् । त्रिभुवन आर्मी क्लबबाट खेल्दै आएका जितेन्द्र मुखिया २ वर्षयता राष्ट्रिय टोलीमा छैनन् । उनले नेपाली टोलीबाट १० टी–२० अन्तर्राष्ट्रिय खेल्दै १० विकेट लिएका छन् ।

करण केसी, अविनाश बोहरा र सोमपाल कामीको प्रभावपछि जितेन्द्रलाई राष्ट्रिय टोलीमा ठाउँ बनाउन मुस्किल भएको थियो । उनी विश्वकपको अफगानिस्तानविरुद्धको खेलमा प्लेयर अफ दी म्याच घोषणा भएका थिए ।

शरद भेषावकरले घरेलु क्रिकेट खेलिरहेपनि २ वर्षयता राष्ट्रिय टोलीमा छैनन् । सन् २०१४ को विश्वकपमा नेपाललाई छनोट गराउन भेषावकरको भूमिका महत्वपूर्ण रहेको थियो ।

उनले निर्णायक इनिङ खेलेका थिए । तर मध्यक्रममा कुशल मल्ल, भीम सार्की, सन्दीप जोराजस्ता खेलाडीको उपस्थितीपछि भेषावकर टिमलाई अँटाउन छाडेका थिए । उनले नेपाली टोलीका लागि २० टी–२० अन्तर्राष्ट्रिय खेल्दै ३ सय २५ रन जोडेका छन् । उनले कुनैपनि खेलमा अर्धसतकीय इनिङ खेल्न सकेनन् । शरद घरेलु क्रिकेटसँगै कमेन्टेरका रूपमा छन्। उनले एपिएफबाट खेल्ने गर्छन् ।

शक्ति गौचन खेलाडी उत्पादनमा व्यस्त छन् । उनले झन्डै डेढ दशक नेपाली टोलीबाट खेलेका थिए । सन् २०१८ पछि भने उनी टोलीमा अँटाएनन् । उनले सन्याश घोषणा भैरहवामा रहेको स्टार क्रिकेट एकेडेमीमा खेलाडी उत्पादन गर्न थालेका थिए ।

अहिले राष्ट्रिय टीमका महत्त्वपूर्ण खेलाडी कुशल मल्ल उनैको उत्पादन हुन् । शक्तिले टी–२० अन्तर्राष्ट्रिय क्रिकेटमा ९ खेल खेल्दै ८ विकेट लिएका छन् । सागर पुन २०१८ पछि अमेरिकामा बस्दै आएका छन् ।

उनी २०२२ को डिसेम्बरमा घरेलु क्रिकेट खेल्न आएका थिए । ब्याटिङ अलराउन्डर सागरले नेपालका लागि ९ टी–२० अन्तर्राष्ट्रिय खेल्दै ९० रन बनाएका थिए भने ६ विकेट पनि लिएका थिए ।

वसन्त रेग्मी पनि अहिले अमेरिकामा छन् । उनले अन्तिम पटक सन् २०१९ मा अन्तर्राष्ट्रिय क्रिकेट खेलेका थिए । उनले पनि झन्डै डेढ दशक नेपाली राष्ट्रिय टोलीबाट खेले। बसन्तले नेपालका लागि १८ टी–२० अन्तर्राष्ट्रिय क्रिकेट खेलमा २५ विकेट लिएका छन् ।

अनिल मण्डल र प्रदीप ऐरी पनि घरेलु क्रिकेट खेल्दै छन् । अनिल आर्मी र प्रदीप एपिएफ क्लबमा आबद्ध छन् । अमृत भट्टराई अस्ट्रेलिया र राहुल विश्वकर्मा युरोपमा छन् । प्रदिप दुई वर्षयता राष्ट्रिय टोलीमा छैनन् । उनले नेपालका लागि १२ खेल खेल्दै ९१ रन जोडेका छन् । अनिल ८ वर्षयता नेपालका लागि खेल्न सकेका छैनन् ।

उनले २ वटा मात्र टी–२० अन्तर्राष्ट्रिय खेले जसमा ११ रन जोडेका थिए । सन् २०१६ पछि राष्ट्रिय टोलीमा नरहेका नरेशले ४ वटा टी–२० अन्तर्राष्ट्रिय खेलमा जम्मा ७ रन जोडेका थिए । राहुलले नेपालका लागि कहिल्यैपनि टी–२० अन्तर्राष्ट्रिय खेल्न पाएनन् । सन् २०१४ पछि उनी टिममा समेत परेनन् ।