रेशमको उपस्थितिमा नाउपा सांसदहरूको बैठक, आफ्नै नेतृत्वमा सरकारको पहल गर्ने ‘समझदारी’

कैलाली । सुदूरपश्चिम प्रदेशमा नागरिक उन्मुक्ति पार्टीले आफ्नै नेतृत्वमा सरकार बनाउने गरी छलफल अगाडि बढाएको छ ।

आज सरकारका एक मन्त्रीको सरकारी क्वाटरमा नाउपा नेता रेशम चौधरीको उपस्थितिमा भएको छलफलमा पदमुक्त भएकी सांसद इन्द्रिरा गिरिसहित सबै सांसदहरू उपस्थित थिए ।

संसदीय दलका नेता रहेका घनश्याम चौधरी, संसदीय दलको नेताको नयाँ जिम्मेवारी पाएका कैलाश चौधरी काम चलाउ प्रदेश सरकारका दुई मन्त्री लक्ष्मण किशोर चौधरी र खुशीराम चौधरी तथा सांसद टिका थापाको उपस्थितिमा नाउपा कै नेतृत्वका सरकार गठन गर्ने विषयमा करिब समझदारी भएको घनश्याम चौधरीले जानकारी दिए । उनले तत्काल बहुमत पुग्ने दलहरूसँग सहकार्य गरेर सरकार गठन गर्ने विषयमा छलफल अगाडी बढेको बताए ।

‘बिहान अनौपचारिक बैठक बसेको थियो । आफ्नै नेतृत्वमा सरकारमा सहभागी हुने गरी अगाडि बढ्ने छलफल भएको छ’ उनले भने ‘त्यही अनुसार हामी छलफल अगाडि बढाइरहेका छौँ । बहुमत पुग्ने गरी हामी सरकारको नेतृत्व गर्छौ ।’

उनले सुदूरपश्चिम प्रदेशमा नागरिक उन्मुक्ति पार्टी एक ठाउँमा रहेको समेत जिकिर गरे ।

‘हामी नेतृत्व गरेर सरकार निर्माण गर्छौ ’ उनले भने ‘त्यो विषयमा हामी सबै सांसद एकमत छौँ । हामीबिच विवाद छैन । हामी एकजुट छौँ ।’

घनश्याम चौधरीलाई अध्यक्ष रन्जिता श्रेष्ठले संसदीय दलको नेताबाट हटाउँदै कैलाश चौधरीलाई जिम्मेवारी दिएकी थिइन् ।
संसदीय दलको नेताको जिम्मेवारी पाएका कैलाश चौधरीले पनि छलफल सकारात्मक भएको बताए ।

‘छलफल सकारात्मक छ । हामी सबै मिलेर अगाडी बढ्छौँ ’ उनले भने, ‘पार्टी केन्द्रीय नेतृत्वको निर्देशन अनुसार र हामी सबै सांसदहरूको भावना अनुसार हामी अगाडि बढ्ने हो । ’

पार्टी भित्र आन्तरिक किचलो पछि सुदूरपश्चिमका सबै सांसदहरू एकै ठाउँमा बसेर छलफल गरेको यो पहिलो पटक हो ।

गठबन्धनका विषयमा संरक्षक रेशमलाल चौधरी र अध्यक्ष रञ्जिता श्रेष्ठबिच मतभेद रहँदै आइरहेको थियो ।

रन्जिता श्रेष्ठ केन्द्रमा भएको नयाँ सत्ता गठबन्धन अनुसार नै सरकार गठन गर्न चाहन्छिन् भने रेशम कांग्रेससँगै सहकार्य गर्न जोड दिइरहेका थिए ।

मङ्गलवार नाउपाका जिल्ला र प्रदेशस्तरका नेताहरूले नाउपा सांसदहरूलाई विभाजित नहुन र एकै ठाउँमा उभिएर प्रदेशको नेतृत्व गर्न सुझाव दिएका थिए । आज त्यही अनुसार सांसदहरूले छलफल अगाडि बढाएका हुन् ।

स्रोतका अनुसार बुधवार बिहानको छलफलमा पनि रेशम चौधरीले नयाँ सत्ता गठबन्धनबाट मुख्यमन्त्री सम्भावना नभएको तर, कांग्रेसमा त्यो सम्भावना रहेको बताएका थिए । तर, कांग्रेसँग मिल्दा बहुमत पुग्न नसक्ने विषयमा पनि छलफल भएको थियो ।

मुख्यमन्त्री निकट स्रोतका अनुसार अहिले कांग्रेस नेतृत्वको सरकारले पनि नाउपालाई मुख्यमन्त्री दिएर सरकार बनाउन खोजिरहेको छ । तर, काङ्ग्रेससँग सहकार्य गर्न नाउपाका सबै सांसदहरू एक ठाउँमा आउने सम्भावना देखिएको छैन । यहाँ कांग्रेसका १८ सांसद छन् ।

नाउपाका सबै सांसदले कांग्रेसलाई साथ दिँदा पनि अझै २ सांसद अपुग हुने देखिन्छ । तर, यता नयाँ सत्ता गठबन्धनसँग नाउपा मिल्दा सहजै सरकार बन्ने हुँदा एमाले माओवादीसँगै मिलेर सरकार बनाउने विषयमा बलियो मत देखिएको एक सांसदले बताए । उनले नाउपाले मुख्यमन्त्री पाउने गरी नयाँ सत्ता गठबन्धनसँगै रहने विषयमा बढी सम्भावना रहेको जिकिर गरे ।

‘हामी यस अघि काङ्ग्रेससँगै थियौँ हामी हुँदा पनि स्वतन्त्र र राप्रपा सांसदले समर्थन नगर्दा सरकार बन्दैन भन्ने देखिसकिएको छ त्यसैले नयाँ गठबन्धनमा जाने र नेतृत्व गर्ने भन्ने विषयमा पनि छलफल भएको छ’ ती सांसदले भने ।

उनका अनुसार नयाँ सत्ता गठबन्धनमा एमाले, माओवादी, नाउपा र नेकपा एकीकृत समाजवादी मिल्दा सरकार गठन हुने देखिन्छ ।

यहाँ एमालेका सभामुखसहित ११, एमालेका १० नाउपाका कारबाही बाहेक ६ र नेकपा एकीकृत समाजवादीका ४ सांसद छन् । स्वतन्त्र एक सांसद पनि नयाँ सत्ता गठबन्धनमै रहने देखिन्छ । यहाँ २७ जना सांसदबाट बहुमतको सरकार गठन हुन्छ ।

सुदूरपश्चिम प्रदेशमा नयाँ सरकार गठनका लागि प्रदेश प्रमुख नजिर मियाँले वैशाख २ गते सम्मको समय दिएर सूचना जारी गरेका छन् । नाउपाको विवादका कारण अहिले सम्म सरकार गठन प्रक्रिया अगाडि बढ्न सकेको थिएन ।

अहिले नाउपा भित्र मिलेर जानुपर्ने र आफैले नेतृत्व गर्नुपर्ने मत बलियो देखिएको छ । यस विषयमा ठोस सहमति भए सत्ता गठबन्धनका अन्य दलहरूसँग पनि छलफल अगाडी बढाउने नाउपा नेताहरूले बताएका छन् ।

नाउपाले सरकारको नेतृत्व दाबी गरिरहेका बेला नेकपा एकीकृत समाजवादीले पनि सरकारको नेतृत्व गर्ने गरी गृहकार्य गरिरहेको छ ।

आफ्नो भागमा मुख्यमन्त्री परेको भन्दै संसदीय दलका नेता दीर्घ सोडारीले बहुमत पुराउने गरी सरकार बनाउने बताउँदै आइरहेका छन् ।