काठमाडौं । राष्ट्रिय स्वतन्त्र पार्टी रास्वपाले बाँदर नियन्त्रणसम्बन्धी अध्ययन भ्रमणमा सांसद पठाउने निर्णयको विरोध गरेको छ ।
रास्वपाको आज बसेको सचिवालय बैठकले बाँदर नियन्त्रणसम्बन्धी अध्ययन गर्न संसदीय समितिले सांसदहरू भारत भ्रमण पठाउन गरेको निर्णयमा आपत्ति जनाउँदै विज्ञ पठाउन अनुरोध गरेको हो । बालीनाली नष्ट गर्ने र कृषकको उठीवास लगाउने बाँदर नियन्त्रणको अध्ययन सम्बन्धित पीडित किसान र विज्ञबाट मात्र सम्भव हुने रास्वपा प्रवक्ता एवं महामन्त्री मुकुल ढकाल बताउँछन् ।
केही दिनअघिमात्र प्रतिनिधिसभाअन्तर्गत कृषि, सहकारी तथा प्राकृतिक स्रोत समितिले बाँदर आतंक नियन्त्रको उपाय खोजीका लागि सांसदहरू भारतको हिमाचल प्रदेशमा अवलोकन भ्रमणमा जाने निर्णय गरेको थियो ।
समिति सभापति आरजु राणाले पुस २६ गतेको बैठकमा आफूले बाँदर व्यवस्थापनका लागि भारतीय राजदूतलाई पत्र लेखेको र रेस्पोन्स राम्रो आएको बताएकी थिइन् । केही दिनअघिमात्र सांसद, केही कर्मचारी र पशु चिकित्सक सम्मिलित टोली लिएर अवलोकनमा जाने निर्णय भएको छ । हिमाचलमा बाँदर बन्ध्याकरण गरी प्रभावकारी नियन्त्रण भएको पाइएकाले त्यहाँको अवस्था अध्ययनका लागि सांसदहरूको टोली जान लागेको हो ।
बाँदर आतंक नियन्त्रण संघर्ष समितिका अध्यक्ष कृष्णप्रसाद सापकोटा पीडित किसानलाई पनि भ्रमण दलमा सामेल गराउन ध्यानाकर्षण पत्र बुझाएका थिए ।
Leave a Reply