शिन्तामणिको व्यवस्थापनपछि विश्वकै उत्कृष्ट होटलको सूचीमा पर्‍यो मुस्ताङ मोक्ष रिसोर्ट

काठमाडौं । मुस्ताङको जोमसोममा अवस्थित शिन्तामणि मुस्ताङ मोक्ष रिसोर्ट सन् २०२४ का लागि विश्वकै उत्कृष्ट र मन पराइएको होटलको सूचीमा परेको छ । नेशनल जोग्राफिकले विश्वका उत्कृष्ट र मन परेका होटलहरूको सूचीमा राखेको शिन्तामणि एसियाको पहिलो नम्बरमा परेको छ । नेशनल जोग्राफीले सन् २०२४ मा घुम्न र प्रकृति तथा पर्वतसँग रमाउन चाहनेहरुका लागि सो होटल सिफारिस गरेको हो । एसियाबाट अन्य दुई उत्कृष्ट होटलमा श्रीलंका र भुटानका छन् ।

स्थानीय ढुंगाबाट प्राचीन तथा परम्परागत डिजाइबाट बनाइएको सो शिन्तामणि मुस्ताङ रिसोर्ट संसारभरबाट हिमाली क्षेत्रका साथै गुम्बा र स्थानीय जनजीवनसँग घुलमिल गर्न चाहने पर्यटकहरूले सर्वाधिक रुचाइएकोमा परेको नेशनल जोग्राफिक डट कमले उल्लेख गरेको छ । अन्तर्राष्ट्रिय ख्यातिप्राप्त होटल ब्राण्ड शिन्तामणि २ वर्षअघि नेपाल भित्रिएको हो । यति वर्ल्ड ग्रुपको सहायक कम्पनी शेर्पा हस्पिटालिटीमार्फत मुस्ताङ्गको जोमसोममा सञ्चालित मोक्ष मुस्ताङ रिसोर्टको व्यवस्थापन सम्हाल्नेगरी शिन्तामणि नेपाल भित्रिएको थियो ।

शिन्तामणि विश्व बजारमा जंगलका बीचमा महँगो होटल सञ्चालन गरेर ख्याति कमाएको ब्राण्ड हो । १ अर्ब १० करोड रूपैयाँ लगानीमा निर्माण भई सञ्चालनमा मुस्ताङ मोक्ष रिसोर्टको व्यवस्थापन उसले सम्हालेपछि रिसोर्ट विश्वकै उत्कृष्ट गन्तव्यमा दरिएको यति ग्रुपको अफ कम्पनीका अध्यक्ष ल्हाक्पा सोनाम शेर्पाले बताए ।

नेपालमा रहेका होटल तथा रिसोर्टमध्ये सबैभन्दा महँगो होटलका रूपमा शिन्तामणि रहेको यसका सञ्चालकको दाबी छ । यो होटलमा एक रातकै १८ सय डलर तिर्नुपर्छ र यसले एक दिनको मात्र प्याकेज बेच्दैन । न्यूनतम तीन दिनमा एकजना पर्यटकले कम्तीमा ५ हजार डलर तिर्ने यो रिसोर्ट खर्चालु पर्यटक लक्ष्य गरी निर्माण गरिएको हो ।

शेर्पा हस्पिटालिटीका प्रमुख कार्यकारी अधिकृत नाम्गेल शेर्पाले शिन्तामणि मुस्ताङले पर्यटकलाई प्रकृतिसँग नजिक राखेर बिदा मनाउने उत्कृष्ट गन्तव्यका रूपमा आभाष दिलाउन सफल बताए ।
संसारभरिका पर्यटकलाई थकाइ मार्ने मुख्य गन्तव्य जोमसोम बनाउने उद्देश्यले पाहुनाको यात्रालाई हिमालयमा सबैभन्दा उल्लेखनीय ३ सय ६० डिग्री, विलासी अनुभव प्रदान गर्ने थलोका रूपमा विस्तार गरिएको छ ।

समुद्र सतहबाट २ हजार ८ सय मिटर उचाइ तथा कालिगण्डकी नदीछेउ जोमसोममा रहेको होटलमा २९ कोठा छन् । होटलका कोठा अमेरिकी आर्किटेक्ट कम्पनी बेन्सलेकै डिजाइनअनुसार पुनर्निर्माण गरिएका छन् ।

photo courtesy shinta mani Facebook page.