क्राइममा आधारित वेब सिरिज ‘आरती’को नेपाली संस्करणको प्रिमियर सम्पन्न

काठमाडाैं । क्राइममा आधारित वेब सिरिज ‘आरती’को नेपाली संस्करणको प्रिमियर सम्पन्न भएको छ । काठमाडौँस्थित अर्किड इन्टरनेशनल कलेजमा एक कार्यक्रमको आयोजना गरी प्रिमियर सम्पन्न गरिएको हो ।

संघीय सांसद एवं मधेश प्रदेशको पूर्व सामाजिक विकासमन्त्री नवल किशोर शाहको प्रमुख आतिथ्यमा प्रिमियरको आयोजना भएको थियो भने कार्यक्रममा सिरिजको इपिसोड १, २ र ६ स्क्रिनिङ्ग समेत गरिएको थियो।

‘नेपाली–मैथिली सिनेमाको इतिहासमा आरती सिरिज धेरै दृष्टिकोणले सराहनीय रहेको छ । यस सिरिजले सत्ता, कानुन र समाजलाई न्यायको जीवन्तताका लागि अभिप्रेरित गर्दछ । सत्ताको दुरूपयोग गर्नेहरू र ढिला गतिमा हिँडने न्यायलयलाई सजग गर्दछ’, कार्यक्रममा बोल्दै पूर्व मन्त्री शाहले भने ।

कार्यक्रममा अभिनेता मुकुन भुषाल, वरिष्ठ कलाकार नवीन श्रेष्ठ, सिनेमाटोग्राफर निरज कंडेल, चलचित्र पत्रकार संघका महासचिव रघुनाथ सापकोटा, अभियन्ता पुण्य गौतम, पूर्व प्रहरी नायब उपरिक्षक चन्द्र नारायण यादव, ब्रीजवाटर कलेजको प्रिन्सिपल नारायण दास, अर्किड कलेजका प्रिन्सिपल विदुर दाहाल, नेत्र ज्योति संघका अध्यक्ष डा.शैलेश मिश्र, गायक सन्तोष सानु, लाफमाण्डुको निर्देशक रूपेश घिमिरे लगायतका अतिथिहरुको उपस्थिति थियाे ।

सिरिजमा नूतन, राज पौडेल, गीता श्री, लक्ष्मण अधिकारी, मनिषा गिरी, शिव कुर्मी, दीप नारायण शर्मा, हरि प्रसाद कंडेल र संसार अधिकारीको प्रमुख अभिनय रहेको छ । रोशन दासको कथा र निर्देशन रहेको सिरिजको कथा लेखन हिक्मत शर्माले गरेका हुन् । सिरिजकोे सिनेमाटोग्राफी नितेश घतानले गरेका हुन भने इडिट कवीर ओड र कलर कमलीले मिलेर गरेका हुन् ।

आशिश दासले निर्माण रहेको सिरिजमा रिता देवी सह–निर्माण रहेको छ। सिरिजमा सह निर्देशक खेम राज कोइराला, प्रोडक्सन एच पी कडेल र क्रियटिभ निर्माता राकेश साह रहेका छन् ।

नेपाली र मैथिली गरी दुईवटा भाषामा निर्माण भएको सिरिजले बलात्कार र महिला हिंसाको कथा बोल्छ । सिरिज ६ भागमा विभाजन गरिएको छ भने सिरिज यहीँ पुस १६ गतेबाट नेट टिभीमा प्रसारण हुने भएको छ ।