विराटनगर । राजस्व विभागको अन्तःशुल्क दुरुपयोग गरेको आरोपमा एक जनालाई प्रहरीले मोरङबाट पक्राउ गरेको छ ।
प्रहरीले मोरङको धनपालथान गाउँपालिका–४ कर्सिया बजारका ४८ वर्षीय सुनीलकुमार राजवंशी लाई पक्राउ गरेको छ ।
मोरङ प्रहरीका प्रवक्ता डीएसपी रञ्जनकुमार दाहालका अनुसार भोला गुट्खालगायतका सुर्तीजन्य पदार्थको ‘प्याकेट’मा प्रयोग हुने स्टिकर दुरुपयोग गरेको बताए ।
उनले विशेष सूचना आएपछि राजवंशीको पसलमा प्रहरीले छापा हानेको बताए । छापा हान्ने क्रममा प्रयोगका लागि तयारी अवस्थामा राखिएको अन्तःशुल्क स्टिकर फेला परेपछि इलाका प्रहरी कार्यालय रंगेलीका इन्सपेक्टर बुद्धिराम चौलागाईं नेतृत्वको टोलीले उनलाई पक्राउ गरेको हो ।
प्रहरीले राजवंशीको पसलबाट ‘रेडीमेड टोबाक्को’ लेखिएको ३ हजार १ सय ४० थान अन्तःशुल्क स्टिकर बरामद गरेको छ । राजवंशीलाई थप अनुसन्धान एवं कारबाहीका लागि आन्तरिक राजस्व कार्यालय विराटनगरमा बुझाइने दाहालले बताए ।
राजस्व छली गर्नलाई भोला गुट्खाको ‘प्याकेट’मा प्रयोग भइसकेको स्टिकर निकालेर पुनः प्रयोगका लागि उनले पठाउने गरेको प्रहरीको दाबी छ । राजवंशीले उक्त स्टिकर विराटनगरतिर आफूले पठाउने गरेको बताएका छन् । तर, कसलाई पठाउने गरेका थिए भन्ने खुलिसकेको छैन ।
गुट्खा, मदिरालगायतका वस्तु अन्तःशुल्क स्टिकर लगाएर मात्रै बजारमा पठाउन पाइन्छ । ‘प्रयोग भइसकेको स्टिकर उप्काएर पुनः प्रयोगका लागि पठाउँदै राजस्व छली गर्ने गरेको पाइएको छ,’ प्रहरीका एक अधिकारीले भने, ‘त्यस्ता स्टिकर स्थानीय व्यापारीसँग पनि संकलन गर्ने गरेको पत्ता लाग्यो ।’
Leave a Reply