कुवेतबाट साेविनाको क्रन्दनः कुटाइले थिलथिलो भएँ, उद्धार होस्

चितवन । घरेलु कामदारको रूपमा कुवेत पुगेकी चितवनकी सोविना परियारले आफूलाई उद्धार गरिदिन आग्रह गरेकी छन् । घरमालिकले कुटपिट गरेर सहनै नसकिने अवस्थामा पुर्‍याएको भन्दै उद्धारको लागि उनले अनुरोध गरेकी हुन् ।

उनले चितवनमा रहेकी आमा ईश्वरीमाया दमाईलाई फोन गरी आफूलाई नेपाल झिकाइदिन अनुरोध गरेकी हुन् । उनकी आमा ईश्वरीका अनुसार सोविना कुवेत गएको गत वैशाखमा १ वर्ष ५ महिना भएको छ । २०७९ साल वैशाखमा भारतको बाटो हुँदै दलालमार्फत घरेलु कामदारको रूपमा उनी कुवेत पुगेकी थिइन् । उनी काठमाडौंबाट पासपोर्ट बनाएर कुवेत गएकी हुन् ।

कुवेतमा सुरुमा बसेको साहुले खानसमेत नदिएपछि उनी ८ महिनाअघि अर्को घरमा काम गर्न सरेकी थिइन् । अहिले त्यही घरमा सोविना काम गर्छिन् ।

अहिले काम गरिरहेको घरकी साहुनी र उनकी छोरी मिलेर दिनदिनै कुट्ने गरेको बताएकाे उनकी आमा ईश्वरीले जानकारी दिइन् ।

साउन महिनामा सोबिनाले टिकटक बनाएको देखेपछि आफूलाई मरणासन्न हुनेगरी कुटेर फोनसमेत नदिएको सोबिनाले बताएकी छिन् । चितवनकै अभियन्ता देवीका कुँवरलाई पुरानो फोनबाट भ्वाइस म्यासेज पठाएर उनले आफूलाई इन्टरनेट पनि चलाउन नदिने गरेको बताएकी थिइन् ।

परियारले भ्वाइस म्यासेजमा भनेकी छिन्, ‘यहाँ मलाई इन्टरनेट पनि दिँदैनन् । इन्टरनेट चलाउन पनि आफ्नो पैसा खर्च गर्नुपर्छ । मलाई घर पठाइदे भन्दा २ वर्षको लागि तेरो पैसा तिरेको छु फिर्ता दिएर जा भन्छ ।’

उनले आफूसँग पैसा आउने बित्तिकै घर पठाउने गरेकोले साथमा पैसा पनि नभएको बताएकी छिन् । सोबिनाका अनुसार दीपक पाण्डे नाम गरेको व्यक्तिको सम्पर्कबाट उनी कुवेत पुगेकी हुन् । उनको नेपालको सम्पर्क नम्बर छैन । भारतको मात्रै नम्बर छ ।

सोविना भरतपुर ५, मा बस्थिन् । उनको ७ वर्षको एक छोरा छ । श्रीमानले पनि रक्सी पिएर यातना दिने कारणले छोरा पढाउने खर्च जुटाउन कुवेत गएकी हुन् ।

उनकी आमा ईश्वरीले भनिन्, ‘म ७ वर्ष कुवेत बसेर आएँ । अब म जान्छु, श्रीमानले काम गर्दैन । मेरो छोरा पनि हुर्काउनु छ भनेर छोरी पठाएँ । अहिले कुटाइ खाएकी छे । काम गर्न जानिन होला, दुःख पाएँ भन्छे । सरकारले सहयोग गरिदिए छोरीलाई फर्काउन हुन्थ्यो ।’

महिनाको ३०/४० हजारका दरले पैसा भने पठाउने गरेको उनकी आमा ईश्वरीले जानकारी दिइन् । परियारका श्रीमान् ताराबहादुर विश्वकर्मा हुन् । उनी गाडी चलाउँछन् ।

उनले श्रीमती नेपाल आएर आफूसँग नबस्ने भनेकोले निवेदन दिएर नेपाल फर्काउन नचाहेको बताएका छन् । उनले निवेदन दिन समेत इन्कार गरेका अभियन्ता कुँवरले बताइन् ।