अर्थोपेडिक सर्जन डा. कपिलमणिले बेलायतमा पाए एफआरसीएस उपाधि

रुपन्देही । अर्थोपेडिक सर्जन डा. कपिलमणि केसीले बेलायतबाट दिइने फेलो अफ रोयल कलेज अफ सर्जन अफ इङल्याण्ड (एफआरसीएस) ग्राजुएजन उपाधि प्राप्त गरेका छन् । नेपालबाट यो उपाधि पाउने डा. केसी तेस्रो अर्थोपेडिक सर्जन हुन् ।

बुटवलको मर्सिसिटी अस्पतालमा कार्यरत अर्थोपेडिक सर्जन डा. केसीले मेडिकल क्षेत्रमा ठूलो सफलता पाएका छन् । यो उपाधि लिने अर्थोपेडिक सर्जन ज्वालाराज पाण्डे पहिलो हुन् । पाण्डेपछि यो उपाधि डा. शैलज रञ्जितकारले पाएका थिए ।

त्यस्तै न्युरोसर्जन स्व. उपेन्द्र देवकोटा, नाक, कान, घाँटी विशेषज्ञ राकेश श्रीवास्तवलगायतले मात्र यो उपाधि लिएका छन् । यो उपाधि लिएसँगै डा. केसीले जुनसुकै बेला बेलायतमा रहेर स्वास्थ्य सेवा दिन पाउनेछन् ।

डा. केसीले सन् २०१७ देखि जइन्ट सर्जिकल अलेज फेलोशिप इक्जामिनेसनका लागि तयारी गरेको बताउँछन् । उनले अस्पतालबाहेकको समयलाई सदुपयोग गर्दै बिहान ३ देखि ९ बजेको समय यही एफआरसीएस ट्रमा एन्ड अर्थोपेडिक सर्जरी अध्ययनमा लगाएको बताए ।

उनले केही दिनअघि बेलायत पुगेर उक्त उपाधि लिएका थिए । उपाधि पाएपछि डा. केसीले काम गर्न थप ऊर्जा र हौसला मिलेको बताए । डा. केसीले लामो समय काठमाडौंको सिभिल सर्भिस हस्पिटलमा काम गरेका थिए । हाल उनी बुटवलस्थित मर्सिसिटी हस्पिटलमा कार्यरत छन् । रुपन्देहीको देवदह मेडिकल कलेजमा आवद्ध डा. केसीले प्यूठानको विजुवार पुगेर सेवा दिने गरेका छन् ।