‘आदिपुरुष’को विवादित संवाद बीप गरेर नेपालमा मात्र हटाइएपछि चलचित्र विकास बोर्डकोे ध्यानाकर्षण

काठमाडौं । भारतीय चलचित्र ‘आदिपुरुष’ मा समावेश ‘जानकी भारतीय छोरी हुन्’ भन्ने विवादित संवाद बीप गरेर नेपालमा मात्र हटाइएपछि चलचित्र विकास बोर्डले ध्यानाकर्षण जनाएको छ। विकास बोर्डले एक विज्ञप्ति सार्वजनिक गर्दै यस विषयमा गम्भीर ध्यानाकर्षण देखाएको हो।

विज्ञप्तिमा यस विषयमा चासो लिने काठमाडौं महानगरका मेयर बालेन शाह र प्रतिनिधिसभा सदस्य असिम शाहलाई धन्यवाद दिएइको छ भने उक्त संवाद चलचित्रबाट यथासक्य हटाउन पहल गरिएको छ।

‘‘आदिपुरुष’ले माता जानकीलाई भारतकी छोरी भनी इतिहासलाई बांगो बनाई तथ्यगत त्रुटीसहित नेपालबाहेकका मुलुकहरुमा चलचित्र रिलिज गरेको छ। सो चलचित्रले नेपालकी ऐतिहासिक पात्रको ईतिहासलाई तोडमोड गरिएको देखिएकोले संसारभर जहाँ प्रदर्शन गरेपनि ‘जानकी भारतीय छोरी हुन्’ भन्ने संवादप्रति कडा आपत्ति जनाउदँछौ’, विज्ञप्तिमा लेखिएको छ।

चलचित्रको संवादलाई सच्याएरमात्र रिलिज गर्नुपर्ने माग राख्दै बोर्डले गर्नुपर्ने पहल अगाडि बढाएको र यस्ता प्रकारका विवादहरुले दुई देशबीचको साँस्कृतिक तथा कुटनीतिक सम्बन्धमा समेत खलल पुग्ने कुरा पनि विज्ञप्तिमा उल्लेख गरिएको छ।