गठबन्धनमा भागबण्डाबारे शेखर कोइराला भन्छन्- देउवा र प्रचण्डजीमा सबैलाई मिलाउने कला छ

काठमाडौं । नेपाली कांग्रेसका नेता डा. शेखर कोइरालाले प्रचण्ड नेतृत्वको सरकार ढालेर कांग्रेस बीचैमा आफ्नो नेतृत्वको सरकार बनाउने खेलमा नलाग्ने बताएका छन्।

पार्टी कार्यालय सानेपामा बसेको कार्यसम्पादन समितिको बैठकपछि एमाले नेताहरूले भन्ने कुराको पछि लाग्न नहुने बताए।

दश दलीय गठबन्धनमा सरकारमा भागबण्डा मिलाउन त गाह्रो होला कसरी मिलाउनुहुन्छ भन्ने सञ्चारकर्मीको प्रश्नमा उनले भने, ‘त्यो कला हो हाम्रो सभापतिजीमा पनि त्यो कला छ। त्यही भएर अहिलेसम्म टिकिराख्नुभएको छ। र प्रधानमन्त्रीजीमा पनि त्यो कला छ। कलाले गर्दा नै हुने न हो। सबै दलहरूमा गिभ एण्ड टेक हुन्छ।’

उनले विश्वासको मत लिएपछि मात्रै सरकारले पूर्णता पाउने बताए। उनले भने, ‘मान्छेलाई अलिकति चित्त नबुझ्ने त भइहाल्छ त्यो स्वभाविक कुरा हो।’

तपाईँको नेतृत्वमा सरकारमा जाने भन्ने चर्चा छ नि भन्ने प्रश्नमा उनले भने, ‘तपाईँले सुन्नुभएको रहेछ धन्यवाद।’

उपराष्ट्रपतिमा भएको दुई वटा उम्मेदवारबारे प्रधानमन्त्री प्रचण्ड, पार्टी सभापति शेरबहादुर देउवा, नेकपा एकीकृत समाजवादीका अध्यक्ष माधव नेपाललगायत शीर्ष नेताहरू बसेर टुंग्याउने उनले बताए।