अमृत साइन्स क्याम्पसका प्रमुखलाई अनेरास्ववियुले जबर्जस्ती राजीनामा गराएको क्रान्तिकारीको आरोप

काठमाडौं । अमृत साइन्स क्याम्पसका प्रमुख लोकबहादुर बराललाई अनेरास्ववियुले जबर्जस्ती राजीनामा गराएको अखिल क्रान्तिकारीले आरोप लगाएको छ ।

क्रान्तिकारीकी अध्यक्ष पञ्चा सिंहले शनिबार विज्ञप्ति जारी गर्दै सहायक क्याम्पस प्रमुख दीपक गुप्तासहित अनेरास्ववियुका केन्द्रीय सदस्य कमल जोशी, उज्ज्वल भण्डारीको समूहले राजीनामा गराउन त्रिवि लैजाँदै गर्दा कालिमाटी प्रहरीले उद्धार गरेको उल्लेख छ । उनले संलग्नलाई कारबाहीको माग गरेकी छन् ।

२०७९ माघ २० गते बराललाई अपहरण र गुन्डागर्दी शैलीमा उक्त समूहले आफैँले राजीनामा पत्र तयार पारी हस्ताक्षर गर्न लगाई सहायक क्याम्पस प्रमुख दीपकराज गुप्ताको गाडीमा राखेर उपकुलपतिसमक्ष राजीनामा पेश गराउन लाँदै गर्दा कालिमाटी प्रहरीले पक्राउ गरेको विज्ञप्तिमा लेखिएको छ ।

क्रान्तिकारी वैधानिक रूपमा आफ्ना माग राख्नुको सट्टा क्याम्पस प्रमुखमाथि अभद्र व्यवहार गरिएको भन्दै कारबाही नगरिए संघर्षमा उत्रिन बाध्य हुने चेतावनी दिएको छ ।