माधव नेपालको प्रश्न- संसद विघटन गर्न पाइने गठबन्धन दलको मान्यता हो ? (भिडिओ)

काठमाडौं । नेकपा एकीकृत समाजवादीका अध्यक्ष माधव नेपाल नेपालमा सबैभन्दा ठूलो समस्या भ्रष्टाचार बनेर आएको बताएका छन् ।

प्रतिनिधिसभाको बैठकमा बोल्दै उनले विकास निर्माण र काम हुन नसक्नुमा भ्रष्टाचार प्रमुख कारक देखाए ।

उनले भने, ‘गफ ठूलो प्रतिबद्धता ठूलो गर्ने । भ्रष्टाचारीको संरक्षक आफैं बन्ने गरेका छौं । भ्रष्टाचारमा संलग्न नहुने भ्रष्टाचारको कारण खोजी गर्ने, भ्रष्टाचार गर्नेलाई दण्डित गर्न सक्यौं भने अरु धेरै काम गर्न सक्छौँ । प्रधानमन्त्रीको प्रतिबद्धता सुन्दा खुशी लाग्यो ।’

उनले नेताहरू धेरै गफ काम कम गर्ने गरेको बताए । उनले गफले मात्रै नहुने भन्दै प्रधानमन्त्रीलाई गफाडी संस्कार नबोक्न सुझाव दिए ।

उनले भने, ‘मदन भण्डारी भन्नुहुन्थ्यो कुराले चिउरा भिज्दैन । त्यसैले कुरा थेरै गरौं काम धेरै गरेर देखाऔं । कुरा सुन्दा-सुन्दा हाम्रो कान थाकिसक्यो । वाक्क-दिक्क भइसक्यो । हामी गफमा कम छैनौं । हामीलाई गफाडीको राजा पनि भन्न सकिन्छ । त्यस्तो गफाडी संस्कारलाई बोकेर अगाडि नबढ्नुस् । म प्रधानमन्त्रीलाई आग्रह गर्न चाहन्छु ।’

प्रमुख प्रतिपक्षी दलले पनि विश्वासको मत दिएपछि सरकारप्रति अविश्वास गर्नुपर्ने कुनै कारण नभएको नेता नेपालले बताए । उनले प्रधानमन्त्री संविधानप्रति प्रतिबद्ध भए नभएको भन्ने ध्यान दिनुपर्ने बताए ।

उनले भने, ‘मैलै यही रोष्ट्रममा सुनेँ । संसद विघटन गर्न पाइन्छ । यो मान्यता गठबन्धन दलको हो ? यो मान्यता हो भने त्यसले खतरनाक संकेत देखाउँछ । जसरी पहिले प्रतिनिधिसभालाई विघटन गरियो। के यो ब्रिटेन हो ? भारत हो ? पुरानो नेपाल हो ? यो गिरिजाप्रसाद कोइराला नेतृत्वको २०५१ को सरकार हो ? यो २०८५ सालको देउवा सरकार हो ?’

उनले प्रधानमन्त्रीलाई आफूखुसी संसद् विघटन गर्ने छुट नदिएको बताए । एमाले अध्यक्ष केपी शर्मा ओलीले संसद विघटन प्रतिगमन नभएको भन्दै दिएको अभिव्यक्तिप्रति आपत्ति जनाए ।