भोट दिने भन्ने कुरा छोरी दिने भन्दापनि ठुलो कुरा हो : राजेन्द्र लिङ्देन

बकैया । राष्ट्रिय प्रजातन्त्र पार्टी (राप्रपा) का केन्द्रीय अध्यक्ष राजेन्द्र लिङ्देनले चुनावमा भोट दिने कुरा बिहेमा छोरी दिने भन्दा पनि महत्वपूर्ण कुरा भएको बताएका छन् । मकवानपुरको बकैया गाउँपालिकामा आज भएको चुनावी सभालाई संवोेधन गर्दै अध्यक्ष लिङ्देनले चुनावमा दिईने मतले जनताको भाग्य र भविष्य निर्धाराण गर्ने बताए ।

लिङ्देनले भने, ‘तपाईले अनेक बिचार गरेर दिएको छोरी पनि कहिलेकाँकी गलत मान्छेको हातमा पर्छ, छोरी गलत मान्छेको हातमा परेपनि त्यहि एउटा छोरीले मात्र दुख पाउँछ तर तपाईले दिएको एउटा भोट पुरै समाज, पुरै देशले दुख पाउँछ, त्यसैले भोट दिनु अघि हजार पटक सोचेर दिनुहोस् ।’

अध्यक्ष लिङ्देनले आफुले पाँच वर्ष अघि सांसदमा भ्रष्ट्राचार गर्नु भनेको आमाको रगत खाए सरह हुने बताएको र सोहि अनरुपको काम गरेको भन्दै नेपालमा भ्रष्ट्राचाररहित राजनीतिको नमुना राप्रपाबाट अन्य दलले सिक्ने बताए । देशलाई भ्रष्ट्राचारमुक्त गरि शुसासन कायम गर्न राप्रपाको शक्ति आवश्यक रहेको भन्दै उनले यो पटक राप्रपालाई बहुमत दिलाएर देशलाई शुसासन तर्फ अघि बढाउन अनुरोध गरे ।

मकवानपुरबाट दिपकबहादुर सिंहल राप्रपाको विचारको नेतृत्व गरेको भन्दै शुसासन र भ्रष्ट्राचारमुक्त समाज स्थापनाको लागि उनलाई जिताउन अनुरोध गरे । भ्रष्ट्राचारमुक्त समाजको लागि प्रतिनिधिसभामा आफुलाई दिपक सिंहजस्तो साथी चाहिने भन्दै उनले यो पटक अनिवार्य रुपमा उनलाई विजयी गराउन अनुरोध गरे ।