करणवीर बोहराविरुद्ध दुई करोड रुपैयाँ ठगी गरेको आरोपमा मुद्दा दायर

काठमाडौं । करणवीर बोहरा टिभी उद्योगका एक प्रमुख अनुहार हुन् । उनी कसौटी जिन्दगी के, नागिन, बिग बोस, किचेन च्याम्पियन र अन्य धेरै रियालिटी शोहरूको हिस्सा भइसकेका छन्।

पछिल्लो समय उनी कंगना रनौतको शो ‘लक अप’ को हिस्सा बनेपछि हेडलाइन्समा आए। शो जित्न नसके पनि विभिन्न कारणले उनी चर्चामा आइरहे। अहिले फेरि उनी नयाँ मसालामा मुछिएका छन् ।

रिपोर्टका अनुसार करणवीर बोहरा र केही अन्य विरुद्ध ४० वर्षीया महिलालाई १ करोड ९९ लाख रुपैयाँ ठगी गरेको आरोपमा मुद्दा दायर गरिएको छ।

समाचार एजेन्सी एएनआईद्वारा गरिएको ट्विट अनुसार, ‘२.५ प्रतिशत ब्याजमा फिर्ता गर्ने वाचा गरेर ४० वर्षीया महिलालाई १.९९ करोड रुपैयाँ ठगी गरेको आरोपमा अभिनेता मनोज बोहरा उर्फ ​​करणवीर बोहरा सहित ६ जना विरुद्ध मुद्दा दर्ता गरिएको छ।’

अहिलेसम्म एक करोड रकम मात्रै फिर्ता भएको र जब आफूले पैसा माग्यो तब करणवीर र उनकी श्रीमतीले सही जवाफ नदिएको उक्त महिलाले दाबी गरेकी छिन।