काठमाडौं । न्याय माग्दै १८ महिनाको बच्चासहित आमरण अनशन सुरु गरेकी निहारिका राजपुतलाई प्रहरीले माइतीघरबाट उठाएको छ ।
निहारिका र उनलाई अनशनमा साथ दिएकी जश्मिन ओझालाई राति करिब ९ बजे प्रहरीले बलपूर्वक उठाएर महानगरीय प्रहरी वृत्त सिंहदरबारमा पुर्याएको हो ।
धनुषाकी निहारिकाले आफूलाई एक पुरुषले बलात्कार गरेर बच्चा जन्मिएको भन्दै कानूनी लडाईं लडिरहेकी छिन् ।
जिल्ला अदालत धनुषाले आरोपिलाई सफाइ दिएपछि उनले उच्च अदालत धनुषामा पुनरावेदन गरेकी थिइन् । तर चार महिना बितिसक्दा पनि अदालतले पेसी नतोकेपछि उनले आमरण अनशन सुरु गरेकी हुन् ।
आफूहरु शान्तिपूर्णरुपमा अनशन बसिरहँदा प्रहरीहरुले लछारपछार गर्दै गाडीमा हालेको अभियन्ता जश्मिन ओझाले बताइन् । प्रहरीले निहारिकाको हातमा हत्कडीसमेत लगाएको उनको आरोप छ ।
‘न्यायको माग गर्दै शान्तिपूर्णरुपमा अनशन बसिरहेकी पिडितलाई अपराधि झैं व्यवहार गरेर हातमा हतकडी लगाउने कस्तो प्रहरी हो ?’ उनले भनिन् ।
जश्मिनका अनुसार प्रहरीले लछारपछार गर्दा निहारिका र उनको शरीरका विभिन्न भागमा चोट लागेको छ ।
काठमाडौं प्रहरी परिसरका प्रवक्ता दिनेश मैनालीले भने निषेधित क्षेत्रमा अनसन बसेकाले त्यहाँबाट हटाइएको बताए । उनले हतकडी लगाइएको र लछारपछार गरेको आरोप अस्वीकार गरे ।
‘बरु प्रहरीमाथि नै हातपात भएको छ,’ एसपी मैनालीले भने । घटनास्थलमा रहेकी प्रत्यक्षदर्शी शिखा खड्काले भने प्रहरीले नै बल प्रयोग गरेको बताइन् ।
निहारिकाले आफ्नो बच्चाको डीएनए परिक्षण गर्न पाउनुपर्ने माग गर्दै आएकी छन् ।
Leave a Reply