दाङमा महरामाथि पोखरेल हाबी, गठबन्धनलाई हराउँदै दुवै उपमहानगरमा एमाले जिताउन सफल

रुपन्देही । नेकपा माओवादी केन्द्र र नेपाली कांग्रेसले बलियो क्षेत्र मानेको दाङका दुवै उपमहानगरपालिका जित हात पार्न नेकपा एमाले सफल भएको छ । माओवादी केन्द्रका नेता कृष्णबहादुर महराको गृहजिल्ला दाङका दुवै उपमहानगरमा आफ्नो उम्मेदवारलाई जिताउन सफल भएका हुन्, नेकपा एमालेका महासचिव शंकर पोखरेल ।

दुवै उपमहानगरमा नेकपा एमाले, नेपाली कांग्रेस र माओवादी केन्द्र तीनै पार्टीले आफू बलियो दाबी गरेका क्षेत्र हुन् । तर एमाले विभाजनबाट बनेको नेकपा एस, जसपा, जनमोर्चा तथा मुख्यशक्ति मानिएका कांग्रेस र माओवादी केन्द्रको बलियो गठबन्धनलाई पराजित गर्दै एमालेको विरासत जोगाउन महासचिव पोखरेल सफल भए ।

गत निर्वाचनमा उपमहानगर जितेको एमालेलाई यसपालि कठिन पर्ने धेरैको विश्लेषण थियो । तर, उनीहरुको विश्लेषण फेल खाएको छ । यही आंकलनलाई ध्यान दिँदै गठबन्धन दलले घोराहीमा माओवादीलाई मेयर तथा कांग्रेसलाई उपमेयर तथा तुलसीपुरमा कांग्रेसलाई मेयर तथा नेकपा एसलाई उपमेयर भागबण्डा मिलाएका थिए ।

दाङमा सत्तागठबन्धनले एमालेलाई क्लिनस्वीप पारेर जाने घोषणा गरे पनि दुवै उपमहानगरमा असफल भएका छन् । महासचिव पोखरेलको कठिन मेहनतले गठबन्धन दलभित्रको विवादलाई टेकेर दुवै पालिकामा जित निकाल्न सकेको एमालेका स्थानीय नेताहरुको विश्लेषण छ ।

रुपन्देहीबाट प्रदेश राजधानी दाङ लगेको जस पाएका पोखरेलले योबीचमा माओवादी नेता महरा निकटका प्रभावशाली नेताहरुलाई एमालेमा भित्र्याए र दुवै पालिकामा कांग्रेस–माओवादीबीचको अन्तरद्वन्द्वमा खेल्न सफल भए ।

दाङ एमाले महासचिव शंकर पोखरेल, माओवादी केन्द्रका नेता कृष्णबहादुर महरा, कांग्रेसका नेता दीपक गिरीलगायतका चर्चित नेताहरूको जिल्ला भएकाले पनि यहाँको चुनावी चर्चा बढी हुने गरेको छ ।

यसअघिको प्रदेश र संघीय निर्वाचनमा दाङको निर्वाचन क्षेत्र नम्बर २ मा तालमेल गरी चुनाव लडेका पूर्वसभामुख महरा र लुम्बिनी प्रदेशका संस्थापक मुख्यमन्त्री पोखरेल यो चुनावमा आमने–सामने भएका थिए ।

दाङमा नेकपा एमालेको विरासत भत्काउन पाँच दलीय गठबन्धनले पूर्ण तयारी गरेका थिए । १० पालिका रहेको जिल्लामा दुई उपमहानगरबाहेक ८ पालिकामा भने कांग्रेस–माओवादीले जितेका छन् ।

घोराहीमा त अघिल्लोपटक एमालेका मेयरसँग बलियो प्रतिस्पर्धा गरेका कांग्रेसका उम्मेदवार भूपबहादुर डाँगी जित्ने पूर्णआशाले उपमेयरमा उठेका थिए ।
२०७४ सालको निर्वाचनमा एमालेका नरुलाल चौधरी २२ हजार ३ मत प्राप्त गरी निर्वाचित भएका थिए । नेपाली कांग्रेसका भूपबहादुर डाँगी क्षेत्रीले १७ हजार ४८४ र नेकपा माओवादी केन्द्रका जीवन गौतमले १२ हजार ८२ मत प्राप्त गरेका थिए ।

तर अहिले कांग्रेस माओवादीको दुवै मत जोड्दा र अन्य तीन साना दलको समेत गठबन्धनलाई साथ रहँदा एमालेलाई सजिलै हराउने आँकलन गठबन्धन दलको थियो । घोराहीमा एमालेबाट मेयरमा दोहोरिएका चौधरीले ३१ हजार ७२८ मत प्राप्त गरे । यसैगरी उपप्रमुखमा एमालेकै हुमाकुमारी डिसीले ३० हजार ४०३ मत प्राप्त गरेर विजयी भइन् । यहाँ नेकपा माओवादी केन्द्रका हेमराज शर्मा डायमण्ड प्रमुखमा र कांग्रेसका भुपबहादुर डाँगी उपप्रमुखमा चुनाव लडेका थिए ।

तुलसीपुर उपमहानगरपालिकामा एमालेबाट मेयर उम्मेदवार टिकाराम खड्का र उपमेयर स्यानी चौधरीले विजयी भएका छन् । गठबन्धनका तर्फका उम्मेदवार नेपाली काँग्रेसका गेहेन्द्र गिरी अघिल्लो निर्वाचनका समेत प्रत्यासी हुन् । गेहेन्द्रको पराजयले निकै मेहनत गरेर टिकट दिलाएका उनकै परिवारका सदस्य कांग्रेस नेता दीपक गिरीलाई चुनौती थपिएको छ ।

उपप्रमुखमा एमाले उम्मेदवार स्यानी चौधरीले गठबन्धनतर्फका उम्मेदवार नेकपा एकीकृत समाजवादीका जोगबहादुर रानालाई फराकिलो मतान्तरले पराजित गरिन् ।

आरोप–प्रत्यारोपमा गठबन्धनका दलहरु

दुवै उपमहानगरमा चुनाव जित्न असफल भएपछि कांग्रेस र माओवादी तथा तुलसीपुरमा उपमेयरको टिकट पाएको नेकपा एसका नेता कार्यकर्ताहरु आरोप–प्रत्यारोपमा उत्रेका छन् । पाँच दलीय गठबन्धन दाङका दुई उपमहानगरपालिकामा फेल भएको निष्कर्ष निकाल्दै एकले अर्कोलाई घात गरेको विषय सामाजिक सन्जालमा छताछुल्ल भएको छ ।

तुलसीपुरमा उपमेयर बनेका जोगबहादुर रानाले नेकपा एसको केन्द्रीय सदस्यबाट नै राजीनामा दिएका छन् । स्थानीयका अनुसार जहाँ एक्लाएक्लै प्रतिस्पर्धा भएको छ, त्यहाँ जित निकाल्न कांग्रेस सफल देखिन्छ । केही पालिकामा माओवादी र साना कम्युनिष्ट पार्टीबीचको तालमेल सफल देखिन्छ । तर उपमहानगरपालिकामा भने मतदाताले गठबन्धन नरुचाएको संकेत गरेका छन् ।

नेकपा एसले गठबन्धनबाट धोका भएको धारणा सार्वजनिक गरिसकेको छ । सो पार्टीका नेता मेटमणि चौधरीले कांग्रेस–माओवादीले गठबन्धनका सहयात्री दललाई नजरअन्दाज गरेको प्रतिक्रिया दिएका छन् ।