भक्तपुर । भक्तपुरको मध्यपुर थिमि नगरपालिकामा ज्वाइँ–जेठान एउटै पदमा चुनावी मैदानमा उत्रिएका छन् । उनीहरु फरक फरक पार्टीबाट मध्यपुर थिमि नगरपालिकाको प्रमुखमा चुनावी प्रतिस्पर्धामा उत्रिएका हुन् ।
एमालेका प्रमुख उम्मेदवार मदनसुन्दर श्रेष्ठ ज्वाइँ हुन् भने नेपाली कांग्रेसका सत्ता गठबन्धनको साझा प्रमुख उम्मेदवार सुरेन्द्र श्रेष्ठ जेठान हुन् । सुरेन्द्र मदनसुन्दरका माइलो जेठान हुन् भने मदनसुन्दर सुरेन्द्रकी बहिनी ज्वाइँ । सुरेन्द्रकी बहिनी एवं मदनसुन्दरकी श्रीमती हुन् सुजाता श्रेष्ठ ।
मदनसुन्दर मध्यपुर थिमि नपाका निवर्तमान प्रमुख हुन् । पार्टीबाट पुनः प्रमुखको टिकट पाइने भएपछि उनले राजीनामा दिएका थिए ।
कसले मार्ला बाजी ?
२०७४ सालमा भएको निर्वाचनमा मध्यपुर थिमिमा एमाले र नेपाल मजदुर किसान पार्टीले तालमेल गरेका थिए । चुनावी तालमेलबाट एमालेका प्रमुख उम्मेदवार मदनसुन्दर निर्वाचित भए तर नेमकिपाका उपप्रमुख उम्मेदवार केदार खड्का पराजित भए । तालमेलबीच उपप्रमुखमा आफ्नो उम्मेदवार हारेपछि नेमकिपाले चुनावी गठबन्धन गर्ने केही नेताहरुलाई कारबाहीसमेत गरेको थियो ।
यसपटक एमाले एक्लै चुनावमा होमिएको छ । मध्यपुरमा राप्रपा नेपालले आफ्नो उम्मेदवारी नदिएकाले उसले एमालेलाई नै सघाउने सम्भावना छ । तर, यहाँ राप्रपा नेपालभन्दा बलियो राप्रपाले प्रमुख र उपप्रमुखमा उम्मेदवारी दिएको छ ।
एमालेसँग तालमेल गरेको नेमकिपाले आफ्नो छुट्टै उम्मेदवारी दिएको छ । यसले गर्दा कांग्रेसभन्दा कमजोर एमालेका उम्मेदवार मदनसुन्दरले दोस्रोपटक बाजी मार्ने सम्भावना कम रहेको मध्यपुर थिमिका कांग्रेस नेताहरु बताउँछन् ।
‘त्यसमाथि एमाले विभाजितसमेत भएको छ’, ती नेताले भने, ‘मध्यपुरमा एमालेका प्रभावशाली नेता एवं प्रदेशसभा सदस्य राजेन्द्रमान श्रेष्ठ नेकपा एकीकृत समाजवादीमा हुनुहुन्छ । यस पनि हिजोको जीत दोहोर्याउन मदनसुन्दरलाई सजिलो छैन ।’
२०७४ सालमा मदनसुन्दरले नेपाली कांग्रेसका अष्टकुमार कवेलाई पराजित गरेका थिए । अष्टकुमारले १०,८४६ मत ल्याउँदा मदनसुन्दरले १४,००० मत पाएका थिए ।
कांग्रेसको अन्तरघातले गर्दा अष्टकुमारले पराजय भोग्नुपरेको थियो । प्रमुखमा पराजित कांग्रेसले यहाँ उपप्रमुखसहित ६ जना वडा अध्यक्ष जितेको थियो । जबकि एमालेले नेमकिपासँगको साँठगाँठमै एकजनामात्र वडा अध्यक्ष जितेको थियो ।
कांग्रेस एकजुट र गठबन्धनको साथ
यसपटक मध्यपुरमा कांग्रेस एकजुट भएको दावी गरिएको छ । त्यसमाथि सत्ता गठबन्धनको साथ रहेको छ कांग्रेसलाई । यहाँ कांग्रेसले प्रमुखसहित नौवटै वडाको अध्यक्ष आफूलाई राखेको छ । उपप्रमुख र केही वडा सदस्य माओवादीको भागमा परेको छ । एकीकृत समाजवादी र जसपाले भने केही वडा सदस्य पाएका छन् ।
पार्टीले सुरेन्द्र श्रेष्ठलाई प्रमुखको टिकट दिएपछि भएको कार्यक्रममा मध्यपुर थिमिमा क्रियाशील कांग्रेसको गुट र गुटिकाका सम्पूर्णजसो नेताहरुको उपस्थिति थियो । उक्त कार्यक्रममा सहभागी सबै गुट र गुटिकाका नेताहरुले एक भएर यसपटक कांग्रेस नेतृत्वको गठबन्धनलाई जिताउने प्रतिबद्धता जनाएका थिए ।
यहाँ कांग्रेसभित्र सभापति शेरबहादुर देउवा नेतृत्वको संस्थापन, वरिष्ठ नेता रामचन्द्र पौडेल तथा शशांक कोइराला, प्रकाशमान सिंह र कृष्णप्रसाद सिटौला तथा गगन थापाको छुट्टाछुट्टै गुट सक्रिय रहेका छन् । यहीं गुटका कारण कांग्रेसको दुईतिहाइभन्दा बढी कार्यपालिका सदस्य रहेको मध्यपुर थिमि नगरपालिकामा कांग्रेसको भूमिका कमजोर भएको थियो । कांग्रेसभित्रको गुट र विभाजनकै कारण नगर प्रमुख मदनसुन्दरले कहिले अष्टकुमार पक्षीय त कहिले तत्कालीन नगर सभापति एवं अहिले नगर प्रमुख उम्मेदवार सुरेन्द्र पक्षीय कार्यपालिका सदस्यहरुलाई साथमा लिएर आफ्नो एकलौटी निर्णय र योजना कार्यान्वयन गरेका थिए ।
कांग्रेसका प्रमुख उम्मेदवार सुरेन्द्र संस्थापन पक्षका हुन् । उनी भक्तपुरका जिल्ला सभापति दुर्लभ थापाको रोजाइका व्यक्ति पनि हुन् । यसअघिका मेयर उम्मेदवार अष्टकुमार प्रकाशमान सिंह पक्षधर हुन् । यसपटक पनि अष्टकुमार नै मध्यपुर थिमिको प्रमुख उम्मेदवार हुने धेरैको अनुमान थियो । उनले उम्मेदवार हुने आकांक्षा पनि देखाएका थिए । तर, काठमाडौँ महानगरपालिकामा प्रकाशमानकै श्रीमती सिर्जना सिंहले प्रमुखको टिकट पाएपछि मध्यपुरमा अष्टकुमारको भाग खोसिएको बताइन्छ ।
कांग्रेस बलियाे, तर…….
मध्यपुर थिमिका एक सञ्चारकर्मी यहाँ कांग्रेस नै पहिलो स्थानमा रहेको दावी गर्छन् । तर निर्वाचनको मत परिणाम नआएसम्म कसले जित्छ भन्न नसकिने उनको भनाइ छ ।
‘२०७४ सालको निर्वाचन ताका पनि कांग्रेस नै पहिलो थियो । एमाले र नेमकिपा मिल्दा पनि कांग्रेसलाई भेट्टाउन हम्मेहम्मेको स्थिति थियो’, उनले भने, ‘तर, परिणाम उल्टो आयो । यसपटक पनि केही भन्न सकिन्न ।’
यता केही उम्मेदवारहरुले हाकाहाकी यति करोड र उति करोड खर्च गरेर जित्छु भनिरहेकाे मध्यपुर थिमिका मतदाताहरु बताउँछन् । अघिल्लो पटक घटनाले पनि यसपटक जसले बढी मत किन्नसक्छ, उसैले नतिजा आफ्नो पक्षमा पार्ने उनीहरु बताउँछन् ।
तर, मध्यपुर थिमिकै मतदाता रमेश प्रजापति भने मतदाताहरु सचेत भइसकेकाले हिजोजस्तो पैसा खर्च गरेर, भोज खुवाएर चुनाव जित्ने दिन गएको बताउँछन् । उनले उम्मेदवारले प्रस्तुत गर्ने एजेन्डाका आधारमा मतदाताहरुले मत दिने बताउँछन् ।
‘जसले नगरवासीको आवश्यकता र माग सम्बोधन गर्छ, उसले मत पाउने हो । दलीय हिसाबले मत दिने र पाउने अलग्गै कुरा हो’, प्रजापतिले भने, ‘तर पैसा खर्च गरेरै मत किन्ने र त्यही मतले निर्वाचन जित्ने भए, जितेका उम्मेदवारले भोलि त्यो पैसा कसबाट र कसरी उठाउँछ भनेर मतदाताहरुले अहिल्यै ध्यान पो दिने हो कि ?’
मध्यपुरमा ४१ हजार ८४२ जना मतदाता रहेका छन् । जसमा पुरुष २० हजार ५३०, महिला २१ हजार ३०८ र अन्य ३ जना रहेका छन् ।
Leave a Reply