थप्पड प्रकरण : के विल र जाडाको सम्बन्धविच्छेद हुन लागेको हो ?

काठमाडौं । अस्कर अवार्डमा कमेडियन क्रिस रकलाई थप्पड हानेपछि विल स्मिथ अझै चर्चामा छन् । तर, यसपटक भने उनी आफ्नो व्यक्तिगत जीवनलाई लिएर चर्चामा आएका छन् ।

अन्तराष्ट्रिय सञ्चारमाध्यमका अनुसार विल र उनकी श्रीमती जाडा पिन्केटबीचको सम्बन्ध राम्रो चलिरहेको छैन । उनीहरुको सम्बन्धविच्छेदको खबर हलिउड फिल्म क्षेत्रमा आएको छ ।

समाचारका अनुसार अस्कर अवार्डमा भएको विवाद दुवैको सम्बन्धविच्छेदको कारण बनिरहेको छ । स्रोतका अनुसार विल र जाडाबीच लामो समयदेखि विवाद चलिरहेको थियो । तर अस्कर अवार्डको घटनापछि यो विवाद भने गहिरिएको छ ।

यदि यो रिपोर्टका अनुसार विल र जाडा अलग भएमा जाडाले विलको आधा सम्पत्ति पाउँनेछिन् । विल स्मिथको कूल सम्पत्ति ३५० मिलियन डलर अर्थात करिब २ हजार करोड छ । यदि यस्तो भयो भने यो उद्योगमा संसारको सबैभन्दा महँगो सम्बन्धविच्छेद हुनेछ।

विल स्मिथले सन् २०२२ को अस्कर अवार्डमा कमेडियन क्रिस रकलाई स्टेजमा थप्पड हानेका थिए। क्रिस रकले विलकी श्रीमतीको टाउकोको बारेमा मजाक गरेकोमा उनले स्टेजमा गएर क्रिसलाई थप्पड हानेका थिए । केही दिनपछि विलले पनि यस घटनाका लागि माफी मागेका थिए ।