छोरी जन्मनासाथ खातामा पाँच हजार, स्थानीय खुसी

सिन्धुपाल्चोक । सिन्धुपाल्चोकको त्रिपुरासुन्दरी गाउँपालिकाले छोरीहरुको शिक्षामा सहयोग गर्ने उद्देश्यले छोरी जन्मनासाथ खातामा पाँच हजार जम्मा गर्ने लोकप्रिय कार्यक्रम ल्याएपछि स्थानीय खुसी भएका छन् ।

गाउँपालिकाले नीति तथा कार्यक्रममार्फत नै गाउँपालिकाभर छोरी जन्मेपछि उनीहरुको खातामा वार्षिक रुपमा पाँच हजार जम्मा गर्ने व्यवस्थाअनुसार छोरी शिक्षा कार्यक्रम सञ्चालन गरेर उनीहरुको खातामा रकम जम्मा गर्ने निर्णय गरेको गाउँपालिका अध्यक्ष भुपेन्द्र श्रेष्ठले जानकारी दिए ।

छोरी जन्मेर वडा कार्यालयमा जन्म दर्ता गरेपछि गाउँपालिकाको कार्यालय नजिकै रहेकोमो इनभेष्टमेन्ट बैंकमा खाता खोलेपछि पाँच हजार जम्मा गर्ने गरेको गाउँपालिका अध्यक्ष श्रेष्ठले जानकारी दिए ।

छोरी भएकै कारण ग्रामीण भेगमा अझै पनि हेलाहोचो गर्ने र शिक्षा समेत भेदभाव गर्ने गरिएकाले उच्च शिक्षा अध्ययन सम्म छोरीहरुलाई सहज होस भन्ने उद्देश्यले गाउँपालिकाले विगत वर्षदेखि छोरी शिक्षाका लागि यो कार्यक्रम अघि सारेएको अध्यक्ष श्रेष्ठको भनाइ छ ।

गत वर्ष मात्रै गाउँपालिकाले ५५ छोरीहरुको खातामा पाँच हजारका दरले रकम जम्मा गरिदिएको छ । छोरीलाई पाँच हजार दिन सुरु गरेपछि आमाहरु खुसी भएको र यसलाई वृद्धी गर्नका लागि आग्रह गरेको अध्यक्ष श्रेष्ठले जानकारी दिए । ‘हामी आगामी वर्षदेखि वार्षिक रुपमा १० हजार छोरीहरुको खातामा जम्मा गर्ने योजनामा छौं’, अध्यक्ष श्रेष्ठले भने, ‘यो व्यवस्था सुरु भएपछि गाउँपालिकाभरका सबै छोरीहरु विद्यालयमा भर्ना भएका छन् ।’

छोरीहरु विद्यालयमा भर्ना हुन थालेपछि भने खातामा रकम जम्मा नहुने गाउँपालिकाले व्यवस्था गरेको छ । ‘विद्यालय जाने उमेर भनेको चार वर्षमा हो,हामी ४ वर्ष उमेरका छोरीहरुलाई मात्रै रकम जम्मा गरिदिने गरेका छौं’, अध्यक्ष श्रेष्ठले भने ।

त्रिपुरासुन्दरी गाउँपालिकाको पिस्कर, चोकटी र धुस्कुनमा थामी समुदायको बढी बसोबास रहेको छ । थामी समुदायमा अझै पनि वालविवाहको प्रचलन कायम नै छ भने छोरीहरुलाई विद्यालयमा पठाउने संख्या पनि थोरै छ । तर गाउँपालिकाले भत्ताको व्यवस्था गरेपछि भने वालविवाह घटेको गाउँपालिका अध्यक्ष श्रेष्ठले दाबी गरे । ‘अहिले विद्यालय उमेर समूहका कोही पनि छोरीहरु घरमा बस्दैनन्, सबै विद्यालयमा आउँछन्’, अध्यक्ष श्रेष्ठले भने ।