राजेन्द्रमान डङ्गोलकाे नियात्राकृति ‘पैतालामा हिउँ, आँखामा हिमाल’ बजारमा

काठमाडौं । राजेन्द्रमान डङ्गोलको नियात्राकृति ‘पैतालामा हिउँ,आँखामा हिमाल’ लोर्कापण भएको छ । अन्तर्राष्ट्रिय महिला दिवसको अवसरमा मंगलबार राजधानीको सोह्रखुट्टेस्थित एक होटलमा नियात्राकृति लोर्कापण गरिएको हो ।

वरिष्ठ नियात्राकार दामोदर पुडासैनी ‘किशोर’,प्रगतिशील साहित्यकार तथा समालोचक तेजविलाश अधिकारीले नियात्राकृति संग्रहमाथि समीक्षात्मक टिप्पणी गरेका थिए ।

टिप्पणी गर्ने क्रममा प्रगतिवादी साहित्यकार तथा राजनीतिकर्मी केशव पुडासैनी ‘बिमल’ले कलात्मकरुपमा कृति उत्कृष्ट भएको बताएका छन् ।
उनले कृतिले समसामयिक समाजको अनुहार देखाउँदै परिवर्तनको सार्थकता प्रस्ट्याउनुपर्ने धारणा राखे ।

प्रगतिशील साहित्यकार तथा समालोचक तेजविलाश अधिकारीले नियात्रा लेखनले स्थान विशेषको संस्कृति र अर्थतन्त्र उत्थानमा भूमिका खेल्नुपर्ने बताए।

निबन्धकार एवं चर्चित समालोचक कुमारी लामाले कृतिकार राजेन्द्रमान डङ्गोलमा प्रश्न गर्ने सामर्थ्य भएको जिकिर गरिन्।  उनले कृतिमा प्रयुक्त केही शब्दप्रति खरो विमति राख्दै कृतिकारलाई आगामी दिनमा सच्याउन आग्रह समेत गरिन् ।

अखिल नेपाल लेखक सङ्घका अध्यक्ष, सह(प्राध्यापक तथा बहुआयामिक प्रगतिशील साहित्यकार डा. धनप्रसाद सुवेदीले अधिकांश नियात्रा भ्रमण प्रतिवेदनभन्दा माथि उठ्न नसकेको यथार्थता औँल्याउँदै यो कृति त्यसभन्दा माथि उठेको जिकिर गरे ।

लोर्कापण कार्यक्रममा सहभागीहरुले कृतिले सूचना प्रदान मात्र नगरी प्रशोधन र व्यवस्थापनसमेत गर्ने धारण राखेका थिए ।