प्रचण्डको प्रष्टोक्ति- पहिले नै एमसीसीको विरोधमा उभिने निर्णय गरेका हौं, प्रदर्शनमा प्रहरी दमन निन्दनीय

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले अमेरिकी सहायता परियोजना एमसीसीका विपक्षमा उभिने आफूहरुले पहिले नै प्रष्ट पारिसकेको बताएका छन् । विवाद र आफूहरूको विरोध बीच सरकारले एमसीसी टेबल गरेको प्रचण्डको भनाइ छ।

‘विवाद र विरोधका बीच सरकारले एमसीसी टेबल गरेको छ,’ सामाजिक संजालमा प्रचण्डले लेखेका छन्, ‘हाम्रो पार्टी र संसदीय दलले एमसीसी का विपक्षमा उभिने आफ्नो मत पहिले नै स्पष्ट गरिसकेको छ।’

एमसीसीको विरोधमा उत्रिएकालाई प्रहरी दमन गरेको भन्दै प्रचण्डले विरोध गरेका छन् । उनले भनेका छन्, ‘एमसीसी टेबल गर्नुहुन्न भन्दै विरोधमा उत्रिएका प्रदर्शनकारीमाथि भएको प्रहरी दमनको विरोध गर्दै घाइतेहरुको सिघ्र स्वास्थ्यलाभको कामना गर्दछु ।’