अदालतले न्याय नदिएको भन्दै फेसबुक लाइभमा ‘कुमारी आमा’को रोदन (भिडिओसहित)

जनकपुरधाम । अविवाहित आमा निहारिका राजपुतले अदालतबाट समेत न्याय पाउन नसकेको भन्दै फेसबुक लाइभमा आएर वेदना पोखेकी छन् । जिल्ला अदालत धनुषाले आरोपी शिवराज श्रेष्ठलाई सफाइ दिएपश्चात उनले यस्तो गुनासो पोखेकी हुन् ।

अदालतको इजलास ५ का न्यायाधीश पशुराम भट्टराईले मुद्दामा अभियोग दावी नपुगेको ठहरसहित आरोपी श्रेष्ठलाई सफाई दिएका थिए् । अदालतका सूचना अधिकारी गंगाप्रसाद मिश्रले आरोपीले कसरी सफाई पाए भन्ने कुरा फैसलाको पूर्णपाठ आएपछि मात्र भन्न सकिने बताए ।

आरोपी श्रेष्ठ सफाई पाएपछि पीडित राजपुत फेसबुक लाइभमा आएर विलौना गरिन् ।

उनले रुँदै भनिन्, ‘मेरो बच्चाले न्याय पाएन । मैले अदालतमाथि अब कसरी विश्वास गर्ने ? मैले यदि आत्महत्या गरेँ भने यसको जिम्मेवार जिल्ला प्रहरी कार्यालय र अदालतका न्यायाधीश हुनेछन् ।’

उनले अदालतका न्यायाधीशमाथि आर्थिक चलखेलको आरोप लगाइन् ।

‘अन्तिम पेशी भनेर म अदालत आउन खोजेकी थिएँ । तर सरकारी वकिलले मलाई रोके,’ उनी भन्छिन्, ‘पेशी सारिदिने भनेको थियो । तर सारेनन् । सरकारी वकिल र न्यायाधीश सबैले पैसा खाएर अपराधीलाई सफाई दिए ।’

महोत्तरीको जलेश्वर घर भएकी निहारिका हाल ३ वर्षीय छोरा लिएर काठमाडौंमा बस्छिन् । उनी न्याय पाउने आशा बोकेर कैयौं पटक जनकपुर अदालत धाएकी थिइन् । उनले उनको अपेक्षाविपरित फैसला अदालतबाट आएको छ । जसले गर्दा उनी विक्षिप्त बनेकी छन् । उनलाई छोरा कसरी पाल्ने र आफू कसरी गुजारा गर्ने भन्ने चिन्ताले सताएको छ ।

निहारिकाको दावी अनुसार करिब ३ वर्ष अगाडी श्रेष्ठले उनलाई प्रेमजालमा पारेर शारीरिक सम्वन्ध राखेका थिए । त्यसपछि नाबालिग उमेरमै उनको गर्भ बसेको थियो । आफू गर्भवती भनेपछि श्रेष्ठले विवाह गर्न नमानेको निहारिकाको भनाइ छ । आफूलाई आर्थिक प्रलोभन देखाएर गर्भको बच्चा फाल्न दवाव दिएको समेत उनले बताएकी छन् ।

तर निहारिकाले मानिनन् । उनले बच्चा जन्माइन् । अहिले उनका छोरा ३ वर्षको भइसकेका छन् । उनी आफूलाई अविवाहित आमाको रूपमा चिनाउने गर्छिन् । आफ्नो वास्तविक नाम र तस्वीर सार्वजनिक गर्न उनले मिडियालाई अनुमति समेत दिएकी छन् ।

अविवाहित आमा बनेरै बाँच्ने तर अपराधीलाई कानूनी कठघरामा उभ्याएर छाड्ने भनेर उनी अदालत पुगेकी थिइन् । तर, अदालतको फैसलाले उनलाई निराश बनाएको छ ।

आरोपी श्रेष्ठले भने निहारिकाबाट जन्मेको बच्चा आफ्नो नभएको बताएका छन् । अदालतमा मुद्दा परेपछि उनी करिब डेढ वर्षसम्म फरार भए । त्यसपछि प्रहरीमार्फत हाजिर भएका उनी थुनामा रहेका थिए । अदालतको फैसलापछि उनले उन्मुक्ती पाएका छन् ।

फेसबुक लाइभ के भनिन् निहारिकाले ?

म अविवाहित आमा निहारिका राजपुत । ३ वर्षदेखि आफ्नो पेटमा बच्चा बोकेर अदालत धाइरहेको थिएँ । जुन मान्छेले मलाई बलात्कार गर्यो, त्यसले आज सफाइ पायो । हाम्रो देशको मरेको न्याय । कसरी म अब कानूनमाथि विश्वास गर्नु रु कसरी सफाई पायो मलाई जवाफ चाहियो । कानूनबाट चाहियो, नेपालको सरकारबाट चाहियो ।

यदि मैले सुसाइड गरेँ भने मेरो बच्चा अनाथ हुन्छ । त्यसको जिम्मेवार कानून हुन्छ, जिल्ला प्रहरी कार्यालय धनुषा हुन्छ । म कसैलाई पनि छाड्दिनँ । सबैले मिलेर पैसा खाएर मलाई अन्यायमा पारेका छन् । मलाई जवाफ चाहियो ।

त्यो मान्छे सात महिनादेखि थुनामा थियो । डेढ वर्षदेखि फरार थियो । यदि अपराधि थिएन भने किन फरार भयो रु किन लुक्यो डेढ वर्ष रु आज उसले सफाई पायो । मेरो बच्चालाई न्याय खोई रु आज म पिडित भएँ, भोली अर्को निहारिका हुनेछ ।

हिजोसम्म मेरो भोलि पेशी छ, आउँ कि नआउँ भन्दा मेरो वकिलले समेत मलाई रोक्यो । सबैले पैसा खाएका छन् । सबैले रोके मलाई, तिमी नआउ, भोलिको पेशी सारिदिन्छु भनेर । जब म त्यहाँ पुग्न सक्दिनँ भनेपछि फैसला गराइयो ।