पूँजी बजारबारे प्रचण्डको टिप्पणी : संसारकै धन एकठ्ठा गर्ने योजना छ, माओवादीले लड्नुपर्छ (भिडिओ)

काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले औद्योगिक क्षेत्रमा लगाउनुपर्ने पूँजीको लगानी पूँजीबजारमा हुनु साम्राज्यवादको विकसित रुप भएको टिप्पणी गरेका छन् । पूँजी बजारको विषयमा पार्टीको दस्तावेजमा नै समावेश गराउने योजना रहेको उनले बताए ।

नेपालको सेयरबजार निरन्तर ओरालो लागिरहेको समयमा प्रचण्डले यस्तो सार्वजनिक अभिव्यक्ति दिएका हुन् । माओवादी केन्द्रका सबै प्रदेशको सम्मेलनलाई काठमाडौंबाट एकैसाथ उद्घाटन गर्दै उनले असान्दर्भिकरुपमा सेयरबजारबारे टिप्पणी गरेका थिए ।

एकाधिकार पूँजीवाद र संशोधनवाद जोडिएर वित्तीय एकाधिकार पूँजीवादमा भूमण्डलीकृत पुँजीवाद बन्दै गएको भन्दै उनले यसलाई निस्तेज गर्नुपर्नेमा जोड दिए । यसविरुद्ध लड्ने जिम्मेवारी माओवादीको भएको उनले बताए ।

अध्यक्ष प्रचण्डले शेयर बजारप्रति लक्षित गर्दै पहिले पहिले पूँजीको लगानी उद्योग र उत्पादनका क्षेत्रमा हुने गरेको तर, अहिले पूँजी वा दोश्रो बजारमा हुनु वित्तीय पूँजीवादको विशेषता भएको उल्लेख गरे ।

नेपाललगायत विश्वभर नै पूँजीको लगानी धितोपत्र, सट्टाबजार, आईएमएफ, विश्व बैंक र एसियाली बैकहरुमा हुने गरेको उनको भनाइ छ ।

प्रचण्डको भनाइको सार यस्तो थियो

पूँजीको लगानी पूँजीमा हुनु साम्राज्यवाद विकसित हुनु हो । उद्योग र उत्पादन क्षेत्रमा पूँजीको लगानी नहुनु नै वित्तीय पूँजीवादको विशेषता भएको छ । अहिले धितोपत्र बोर्ड, सत्ता बजार, आईएमएफ, विश्व बैंक, एसियाली बैंक लगायतमा लगानी हुन्छ ।

हामीले यी बैंकहरुले पैसा जम्मा गरेर यताउता लगानी गर्दछन् भन्ने गरेका छौं । तर, त्यस्तो होइन । यसरी शेयर बजारमा लगानी गर्नु साम्राज्यवादका विकसित रुप हुन् । यसरी वित्तीय एकाधिकार पूँजीवादलाई बलियो बनाएर विश्वका सीमित पूँजीपतिहरुको हातमा संसारकै धन एककठ्ठा गर्ने योजना हो ।

यसरी विश्वको पैसा सीमित पूँजीपतिहरुले हातमा लिएर ८० प्रतिशत जनतालाई भोको र नाङगो राख्ने प्रणाली पूँजीबजार हो । पूँजीबजारमा लगानीको विकास र विस्तारलाई हामीले परास्त गर्नु सक्नु पर्छ ।

पूँजीबजारबाट पूँजीपतिहरुले सिधै पूँजीबाट पूँजी लिने गर्दछ । अब पूँजीको लगानी उत्पादनमा हुँदैन । धितोपत्रमा र सत्ता बजारमा हुन्छ । बैंकहरुले सिधै घरजग्गा किनबेचमा लगानी लगाउँछन् । घरजग्गाको कारोबारबाट सिधै पैसा आउने गर्दछ । थोरै लगानीमा छोटो समयमा अबौ कमाउने गरेका छन् । अहिले विश्वभर नै शेयर बजारमा लगानी बढ्न थालेको छ ।

विश्वभर नै यो क्षेत्रमा पूँजी लगानी बढ्दै गएकाले यसको अध्ययन अनुसन्धान र विश्लेषण गर्नु जरुरी छ । यस प्रकारमा विकृतीको विष्लेषण गरेर यससँग लड्ने तरिका खोज्ने अभिभारा माओवादीको हो । यसको अनुसन्धान नगरेसम्म देशमा, मुलुकको अर्थतन्त्रमा उज्यालो पनि आउँदैन ।