हैजा रोक्न डब्लूएचओले नेपाललाई २ लाख ५२ हजार डोज ओरल खोप दिने

काठमाडौं । नेपालको कपिलवस्तुमा फैलिएको झाडापखाला रोकथामका लागि विश्व स्वाथ्य संगठनले २ लाख ५२ हजार ३६३ डोज ओरल खोप दिने भएको छ ।

विश्व स्वास्थ्य संगठनको समन्वयमा मुखबाट खाने हैजाको ओरल खोप ल्याउने तयारी भएको स्वास्थ्य मन्त्रालयले विज्ञप्ति मार्फत जानकारी दिएको हो । झाडापखाला फैलिएको क्षेत्रमा चाडै खोप ल्याउन प्रतिबद्ध भएको डब्लूएचओले जनाएको छ ।

गत असोज १८ गतेदेखि कपिलवस्तुको कृष्णणनगर नगरपालिकाका तीन वटा वडामा झाडापखला प्रकोप फैलिएको थियो। मन्त्रालयका अनुसार प्रकोपबाट चार जनाको मृत्यु भइसकेको छ ।

प्रदेश स्वास्थ्य तथा जनसंख्या मन्त्रालयका सचिव डा. विकास देवकोटाले भने, ‘रोग फैलिन नदिन खोपको आवश्यक छ, यदि हामीले खोप अभियान सुरु गरेनौं भने रोग समाजमा दीर्घकालीन समस्याको रूपमा रहन सक्छ ।’

झाडापखालापछि संकलन गरिएका दिसाका नमुना परीक्षण गर्दा भाइब्रियो कोलेरा र ओगावा भाइरस देखापरेको थियो । खानेपानी संस्थानले वितरण गरेको पानीमा इकोली नामक जीवाणु फेला परेको थियो।