शिव र सलोनको ‘डाँडाको वरपीपल’ छायांकन सुरु, यस्तो छ फिल्मको फस्टलुक

काठमाडौं । शोभित बस्नेतको निर्देशन रहने फिल्म ‘डाँडाको वरपीपल’ छायांकन धादिङको धार्केदेखि सुरु भएको छ । उनको यो ३१ औं निर्देशकीय फिल्म हुनेछ । काठमाडौं उपत्यकाको निषेधाज्ञा केही खुकुलो भएपछि भदौ ७ गतेदेखि फिल्म छायांकन सुरु भएको हो । कोरोनाभाइरसको दोस्रो लहरको कारण रोकिएको फिल्म गतिविधि खुलाउन अहिले पनि कानूनी अनुमति चाहिँ छैन ।

६० दिनको छायांकन तालिका रहेको फिल्मलाई काठमाडौं र मकवानपुरको चित्लाङ सेरोफेरोको लोकेसनमा खिचिने भएको छ । फिल्ममा शिव श्रेष्ठ, भुवन केसी, गौरी मल्ल, सलोन बस्नेत, रुबिना थापा, विनोद न्यौपाने, राजीवजंग बस्नेत, अस्मिता जुरेली, हिउँवाला गौतम, उत्तम केसी, संगम भण्डारी, सुशान्तकुमार श्रेष्ठ, प्रभात पल, अस्मी थापा, प्रदीप गिरी, ज्ञानकुमार कट्टेल, टेकेन्द्र न्यौपानेको अभिनय छ ।

बुढासुब्बा ओर्जिनलको प्रस्तुतिमा निर्माण हुने फिल्ममा नवराज गिरीको लगानी हुने जनाइएको छ । रामकाजी घिमिरेको लेखन रहने फिल्ममा सुशान्त प्रजापतिको छायांकन, शिव मुखिया/एलिस कार्कीको संगीत, रोशन श्रेष्ठको द्वन्द्व गोविन्द राई, रामजी लामिछानेको कोरियोग्राफी, नवराज, गिरीको गीत, मित्रदेव गुरुङको सम्पादन, रामजी राउतको मुख्य सहायक निर्देशन र आकाश बुढाथोकीको सहायक निर्देशन रहनेछ ।