नेपाल प्रेस फलोअप : वान एक्स बेटलगायत अवैध अनलाइन बेटिङ साइट नेपालभर बन्द

Written by

काठमाडौं । वान एक्स बेट लगायत विभिन्न अवैध सट्टेबाजी गर्ने अनलाइन बेटिङ साइट बन्द गर्न राष्ट्र बैंकले निर्देशन दिएको छ । नेपाल प्रेसले वान एक्स बेटलगायत अवैध अनलाइन बेटिङका धन्दा कसरी चलिरहेका छन् भनेर नियमक निकायहरुको ध्यानाकर्षण गर्न सिरिजमै समाचार प्रकाशन गरेको थियो ।

प्रहरीको अपराध महाशाखाले समेत अवैध सट्टेबाजीमा संलग्नहरुको खोजी गरिरहेका बेला नेपाल राष्ट्र वैंकले नेपाल दूरसञ्चार प्राधिकरणलाई पत्राचार गर्दै वानएक्स बेटसहितका अनलाइन बेटिङहरु नेपालभर बन्द गर्न निर्देशन दिएको छ ।

राष्ट्र वैंकको पत्राचार लगत्तै नेपालमा अवैध रूपमा भइरहेको अनलाइन बेटिङ र ग्याम्ब्लिङ सम्बन्धी वेबसाइटहरू वान एक्सबेट, लगायतलाई नेपालभर चल्न प्राधिकरणले इन्टरनेट सेवा प्रदायकलाई सोमवार निर्देशन दिएको छ ।

नेपाल राष्ट्र बैंकले असार ३१ गते गैरकानूनी बेटिङ कार्य रोक्न प्राधिकरणलाई निर्देशन दिएको थियो । प्राधिकरणका अनुमतिपत्र शर्त अनुगमन शाखाका प्रमुख सहायक निर्देशक हस्तवहादुर शाहीले नेपालभर त्यस्तै वेवसाइट चल्न नदिने गरि बन्द गर्न र सो को जानकारी गराउन भनेका छन् ।

राष्ट्र वैंकले नेपालमा अनलाइनमर्फत जुवा खेल्ने,खेलाउने तथा बाजी राख्ने प्रयोजनका लागि सन्चालनमा रहेका वानएक्स बेट डट कम लगायतका विदेशी बेटिङ वेवसाइटहरुले विभिन्न एजेन्टमार्फत बेटिङ गर्ने गरेको जनाएको छ ।

त्यस्ता एजेन्टहरुले राष्ट्र बैंकबाट अनुमतिप्राप्त भुक्तानी सेवा प्रदायक संस्थाहरुले सन्चालनमा ल्याएका वालेटहरुबाट भुक्तानी हुने गरेको उजुरी र गुनासो आइरहेको भन्दै बन्द गर्न पत्राचार गरेको हो । नेपाल प्रेसले कसरी अवैध रुपमा नेपाली पैसा विदेशिएको छ भन्ने समाचार प्रकाशन गरेको थियो ।

नेपालमा पछिल्लो समय अवैध सट्टेबाजी, अनलाइन क्यासिनो जस्ता कानुनले बर्जित गरेका धन्दाहरू मौलाइरहेका छन् ।