रवीद्र मिश्रको टिप्पणी- राजदूत नै प्रधानमन्त्रीको घर पुग्छ्न्, किन आउँछ समकक्षीको बधाई !

काठमाडौं । कांग्रेस सभापति शेरबहादुर देउवा प्रधानमन्त्री हुँदा छिमेकी राष्ट्रहरुले खुलेर बधाई नदिएको विषय अहिले चर्चामा छ । भारतले राजदूतमार्फत बधाईको औपचारिकता निभाएको छ भने चीनले अहिलेसम्म बधाई नै दिएको छैन ।

विवेकशील साझा पार्टीका संयोजक रवीन्द्र मिश्र छिमेकी राष्ट्रहरुबाट भएको यस्तो व्यवहारलाई नेपालकै प्रधानमन्त्री तथा पूर्वप्रधानमन्त्रीहरूको कमजोरीको नतिजाका रूपमा लिन्छन् । नेपालका उच्चपदस्थहरू आफ्नो मर्यादामा नबस्दा विदेशीले हेप्ने गरेको उनको टिप्पणी छ ।

फेसबुकमा मिश्रले लेखेका छन्, ‘नयाँ प्रधानमन्त्री नियुक्त हुँदा छिमेकी देशका समकक्षीबाट तुरुन्तै बधाईमात्र होइन भ्रमणको निम्ता समेत आउँथ्यो । अब नेपाल यति हलुका बनिसक्यो कि राजदूतले ट्विटरमा या सरासर घरमा गएर बधाई दिए हुने भयो ।’

प्रधानमन्त्रीलाई विदेशी गुप्तचर निकायका प्रमुख आएर मध्यरातमा थर्काउने, भुतपूर्व प्रधानमन्त्रीहरू विदेशी कूटनीतिज्ञलाई भेट्न होटलमा लाइन लागेर उभिने तथा नेताहरु विदेशी दूतावास धाउने तथा राजदूतहरू नेताका घरघर धाउने गर्दा अन्तर्राष्ट्रिय कूटनीतिमा नेपालको सम्मान कायम नभएको मिश्रले उल्लेख गरेका छन् ।

उनले लखेका छन्, ‘यी नेताले यो देशको हुर्मत यति लिए कि त्यसलाई पुन:स्थापना गर्न हम्मेहम्मे पर्नेछ। चारपटक पहिल्यै प्रधानमन्त्री भइसकेका शेरबहादुर देउवाको त ढङ्ग छैन । अरुको के कुरा गर्नु !’