१० बुँदे सहमतिले माधव समूहमा असन्तुष्टि, प्रतिगमनका अगाडि घुँडा टेकेको आरोप

काठमाडौं। एमाले एकताका लागि गठित वार्ता कार्यदलले गरेको १० बुँदे सहमतिप्रति माधव नेपाल समूहमा असन्तुष्टि बढेको छ । वरिष्ठ नेता माधवकुमार नेपाल स्वयंले सम्झौताप्रति असन्तुष्टि जनाएका बेला उनी निकट नेताहरुले यो सहमति अश्वीकार गर्ने बताएका छन् ।

नेपाल निकट पोलिटव्युरो सदस्य डा. विजय पौडेलले यही सहमति भएको हो भने प्रतिगमनका अगाडि घुँडा टेकेको बताएका छन् । उनले यस्तो सहमतिले पार्टी एकता नहुने समेत प्रष्ट पारेका छन् ।

पौडेलले भनेका छन्, ‘यदि यसमा सहमति भएको हो भने यो लिखत प्रतिगमनका अगाडि घुँडा टेकेको हो । ‘प्रतिनिधिसभा बिघटन गर्नु गलत थियो’सम्म भन्न नसक्ने यस्तो सहमतिले पार्टी एकता हुन्न ।’

अर्का पोलिटव्युरो सदस्य जगन्नाथ खतिवडाले सहमतिको राजनीतिक अन्तरवस्तुमा आफू अहिले टिप्पणी नगर्ने र माधव नेपाल समूहमा छलफलपछि प्रतिक्रिया दिने बताए ।

तर, प्राविधिक कुरामा भने आफू असहमत रहेको खतिवडाले बताए । उनले आफूलाई नेकपा एमालेको १४ औं केन्द्रीय कमिटी बैठकमा सहभागिताका लागि एसएमएस आएको भन्दै त्यो मान्य नहुने बताए ।

खतिवडाले नेपाल प्रेससँग भने, ‘२०७५ जेठ ३ गते एमालेको नवौं केन्द्रीय कमिटी बैठक बसेको थियो । अब १० औं बैठक बस्नुपर्नेमा १४ औं बैठक भनेर बोलाइनु फागुन २८ यताका सबै निर्णय मान्य हुने हो । यो कसरी हुन्छ ?’

खतिवडाले १० बुँदे सहमतिले प्रतिनिधिसभा विघटन सही हो भनेर पुनःस्थापनाको विपक्षको आशय व्यक्त गरेको बताए ।