‘अल्पमतमा पर्ने प्रष्ट हुँदा पनि वहुमतको सरकार बनाउने कुरामा सहमत हुन नसकेर राजीनामा दिएँ’

आइतबार बिहान नेकपा एमाले संसदीय दलको बैठकमा सहभागी लुम्बिनी प्रदेशसभामा कपिलवस्तुबाट निर्वाचित प्रदेशसभा सदस्य दीर्घनारायण पाण्डेले आकस्मिकरुपमा एमाले र संसद पदबाट राजीनामा दिएको बताएका छन् । हिजो दिउँसो लुम्बिनी प्रदेशसभाका सभामुखसमक्ष पाण्डेले राजीनामा बुझाएका हुन् ।
पाण्डे तत्कालीन नेकपाको उम्मेदवारका रुपमा कपिलवस्तु निर्वाचन क्षेत्र नम्बर २ (क) बाट निर्वाचित भएका थिए । उनले पछिल्लो राजनीतिक घटनाक्रम र परिस्थितिलाई नियाल्दै हिजैदेखि लागू हुने गरी प्रदेशसभा सदस्य र नेकपा एमालेबाट समेत राजीनामा दिएको बताएका छन् । उनै पाण्डेसँग गरिएको कुराकानी ।

आकस्मिक रुपमा किन आयो तपाईंको राजीनामा ?

जुन योजना र उद्देश्यका साथ प्रदेशसभामा निर्वाचित भएर आएको थिएँ प्रदेशसभा सदस्य भएर ती योजना र उद्देश्य अनुसार काम गर्न सकिएन, प्रदेशसभामा बसेर मधेसी जनताको पक्षमा काम गर्न नसकेपछि फेरि जनताकै बीचमा गएर काम गर्न राजीनामा दिएको हुँ ।

बिहान संसदीय दलको बैठकमा बस्नुभयो, दिउँसो राजीनामा किन ? भित्रै असहमतिका कुरा राख्नुभएन कि सुनिएन ?

म एमालेको संसदीय दलको बैठकमा गएको थिएँ, उपस्थितिमा हस्ताक्षर पनि गरेको हुँ तर निर्णयमा हस्ताक्षर गरेको छैन । आफू अल्पमतमा परिने प्रष्ट हुँदा पनि पुनः सरकारमा जाने विषयमा मेरो असहमति हो ।

तपाईको असन्तुष्टि पार्टीसँग हो कि मुख्यमन्त्रीसँग ?

कुरा के हो भन्दा सत्ता राजनीतिमा मात्रै केन्द्रित हुनुभयो हाम्रो मुख्यमन्त्री शंकर पोखरेल र उहाँको पार्टी । विकासमा केन्द्रित हुनुपर्नेमा राजनीतिक सत्तामा मात्रै केन्द्रित हुने, हाम्रो गणना सत्ता जोगाउन मात्रै हुने, अनि उहाँको सत्ता जोगाउन मात्रै हामी सांसद भइरहनुपर्ने ? जनताको माग सम्बोधन गर्न उहाँले केही पनि गर्नुभएन । यस्तो अवस्थामा म उहाँहरुसँगै बस्न नचाहेको हुँ ।

तपाईलाई अविश्वासको पक्षमा फ्लोर क्रसका लागि तयार गरिएको, एमालेको माधव नेपाल समूहमा लागेको आरोप लाग्ला नि अब त ? कि प्रलोभनमा दिनुभयो राजीनामा ?

होइन कसले के भन्छ भन्नेतिर म लागिन । विवेक पु¥याएरै मैले निर्णय लिएको हुँ । मैले पार्टीबाट समेत राजीनामा दिएकाले अब स्वतन्त्र रूपमा जनताको सेवामा समर्पित हुनेछु । यहाँ आउँदा मेरा केही अपेक्षा थिए, ती पूरा भएनन् । मैले कसैको दबाबमा परेर वा पार्टीलाई अप्ठयारोमा पार्नका लागि राजनीनामा दिएको होइन । म एमालेको कुनै पनि समूहमा थिइनँ र छैन ।

नयाँ सरकार बन्दा पनि मन्त्री नपाएको भएर हो तपाईको असन्तुष्टि ?

जनताले मबाट धेरै अपेक्षा राखेर जिताएर पठाएका थिए । म जननिर्वाचित सांसद भएकाले उहाँहरूको माग सम्बोधन भएन भने मैले फेरि चुनावमा कुन मुख देखाएर जाने ? मेरो सरोकार जनताका दुःख सम्बोधन गर्नेमा हो, सरकारमा सहभागी हुने होइन । त्यसैले मैले यस्तो कारणले राजीनामा दिएको भनेर सबै मतदातालाई भन्न पाउने छु मलाई अवसर नै दिइएन, काम गर्न दिइएन भनेर ।

के एजेण्डा थिए त तपाईका जुन मुख्यमन्त्रीले पूरा गरिदिएनन् ?

चुनावमा जनतासामू विकासका धेरै एजेण्डामा प्रतिवद्धता गरेको छु । विकासका हिसाबले निकै पछाडि परेको जिल्ला हो– कपिलवस्तु । सडक, विद्यालय र स्वास्थ्य पूर्वाधार निर्माण लगायतका धेरै काम गर्ने प्रतिवद्धता गरेको थिएँ । धेरैपटक मैले मुख्यमन्त्रीलाई यो कुरा सुनाए पनि उहाँले ती विषयमा कहिल्यै ध्यान दिनुभएन । सुन्न पनि चाहनुभएन । उहाँको पार्टीबाट विकास र समृद्धिको नारा लिएर जनताको बीचमा गएको मान्छे म जनताका माग पूरा नभएपछि किन बसिरहने ? मेरो सवाल यही हो । आज म धेरै नबोलौं पछि फेरि कुरा गरौँला ।